الماتىدا موپەدشى پوليتسيا قىزمەتكەرىن قاعىپ كەتىپ، بوي تاسالاماق بولدى
وقيعا 12-مامىر كۇنى ساعات 16.00 شاماسىندا الماتىنىڭ مەدەۋ اۋدانىندا بولدى.
«دوستىق داڭعىلى مەن قۇرمانعازى كوشەسىنىڭ قيىلىسىندا باسىنا شلەم كيمەگەن موپەد جۇرگىزۋشىسىن بايقاپ قالدىق. توقتاۋ تۋرالى بۇيرىقتى ورىندامادى. كەرىسىنشە، جوعارى جىلدامدىقپەن جەكە ۇيلەر اراسىمەن قاشىپ كەتۋگە تىرىستى.
بۇدان بولەك، ول جول قوزعالىسىنا قاتىسۋشىلارعا ناقتى قاۋىپ ءتوندىردى. قۋىس كوشەدە موپەدتى جاياۋ قۋا باستادىم. موپەدشى ارتقا بۇرىلىپ، ماعان قاراي ادەيى ءجۇردى. سوقتىعىسۋدان قاشىپ قۇتىلۋ مۇمكىن بولمادى. مەن قۇلادىم. ال موپەدشى باسقارۋ تەتىگىنە يە بولا الماي، كەدەرگىگە سوقتىعىستى. سودان كەيىن ول ۇستالدى»، - دەدى الماتى قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ پاترۋلدىك پوليتسيا پولكىنىڭ ينسپەكتورى جانىبەك ورازبايەۆ.
موپەدشى كۋرەرلىك كومپانيالاردىڭ ءبىرىنىڭ 23 جاستاعى قىزمەتشىسى بولىپ شىقتى.
«زارداپ شەككەن پوليتسەي اۋرۋحاناعا جەتكىزىلدى. جول-كولىك وقيعاسى جانە پوليتسيا قىزمەتكەرىنىڭ زاڭدى تالاپتارىنا باعىنباۋ دەرەكتەرى تىركەلدى. موپەد جۇرگىزۋشىسى ق ر زاڭناماسىنا ساي جاۋاپكەرشىلىككە تارتىلاتىن بولادى»، - دەلىنگەن مالىمەتتە.
