قىتايلىق قانداسىمىز فينالدا قازاقستاندىق نۇربەك ورالبايمەن جۇدىرىقتاسادى

استانا. قازاقپارات - تاشكەنتتە ەرلەر اراسىندا ءوتىپ جاتقان بوكستان الەم چەمپيوناتىندا نۇربەك ورالباي فينالعا شىقتى، دەپ حابارلايدى قازاقپارات ءتىلشىسى.

نۇربەك ورالباي 80 كەلىگە دەيىنگى سالماقتا توكيو وليمپياداسىنىڭ قولا جۇلدەگەرى، رەسەيلىك يمام حاتايەۆپەن بوكستاستى.

ەكى راۋندتا باسىمدىق تۇگەلدەي نۇربەكتە بولدى. قورىتىندى ەسەپ - 4:1.

وسىلايشا، 80 كەلىگە دەيىنگى سالماقتا فينالدا قوس قازاق - نۇربەك ورالباي مەن قىتايلىق توقتاربەك تاڭاتحان التىن جۇلدەنى ساراپقا سالادى.

ەسكە سالا كەتەيىك، بۇدان بۇرىن قازاقستاندىق بەس بوكسشىنىڭ الەم چەمپيوناتىنىڭ فينالىنا شىعۋ ءۇشىن تالاساتىنىن جازعان بولاتىنبىز.

سونداي-اق قازاقستان قۇراماسىنان العاشقى بولىپ سانجار تاشكەنباي الەم چەمپيوناتىنىڭ فينالىنا شىقتى.

سونىمەن بىرگە ماحمۇد سابىرحان، دۋلات بەكباۋوۆ جانە ۇلتتىق قۇراما كاپيتانى اسلانبەك شىمبەرگەنوۆ تە - فينالدا.