ۇلتتىق قوردان بالالارعا اۋدارىلاتىن اقشانى قايدا جۇمساۋعا بولادى

استانا. قازاقپارات - ۇلتتىق قوردان بالالاردىڭ جەكە شوتىنا قارجى اۋدارۋ پروتسەسى ءتۇسىندىرىلدى، دەپ حابارلايدى قازاقپارات ءتىلشىسى.

بۇگىن ادىلەت مينيسترلىگى ۇيىمداستىرعان زاڭ جوبالاۋ ماسەلەلەرى جونىندەگى ۆەدومستۆوارالىق كوميسسيا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

«ەلىمىزدە العاش رەت ۇلتتىق بايلىقتى 18 جاسقا دەيىنگى بالالار مەن جاس وسپىرىمدەرگە ءبولۋ مۇمكىندىگى تۋدى. ياعني، ۇلتتىق قوردىڭ ينۆەستيتسيالىق تابىسىنىڭ %50 بالالار اراسىندا بىركەلكى بولىنەتىن بولادى. ەسەپ وتكەن 18 جىلدىڭ ورتاشا جىلدىق ءمانى ەسەبىنەن جۇرگىزىلەدى. نەلىكتەن وتكەن 18 جىل؟ ويتكەنى، نارىقتاعى داعدارىس جاعدايىن ەسكەرسەك، كەيدە ۇلتتىق قوردىڭ كىرىسى تەرىسكە شىعۋى مۇمكىن. ونى تەڭەستىرۋ - ۇزاق پروتسەسس. ايتار بولساق، 2005-2023-جىلدار ارالىعىندا 18 جاسقا تولماعان بالالار مەن جاس وسپىرىمدەر سانى - 6,5 ميلليون. دەمەك شامامەن 6,5 ميلليون بالا ۇلتتىق قوردىڭ ينۆەستيتسيالىق تابىسىنىڭ ءبىر بولىگىن الۋى مۇمكىن»، - دەدى ءماجىلىس دەپۋتاتى بەرىك بەيسەنعاليەۆ شارا بارىسىندا.

سول سياقتى حالىق قالاۋلىسى كامەلەتكە تولعان ازامات جەكە شوتىنداعى قاراجاتتى قايدا جۇمساي الاتىنىن ايتتى.

«18 جاسقا تولعان سوڭ بالا ۇلتتىق قوردان تۇسكەن تولەمدى تۇرعىن ءۇي ساتىپ الۋعا، ءبىلىم الۋعا، ونىڭ ىشىندە شەتەلدە ءبىلىم الۋ مۇمكىندىگىنە جۇمساي الادى. ايتپاقشى، باسپانانى تەك قازاقستان اۋماعىنان ساتىپ الۋى ءتيىس. ەگەر كامەلەتكە تولعان ازامات تۇراقتى تۇرۋعا شەتەلگە كەتسە نەمەسە ازاماتتىعىن اۋىستىرسا وندا قوردىڭ تولەمىنەن ايرىلادى»، - دەيدى ول.

جيىن بارىسىندا قارجى ۆيتسە-ءمينيسترى داۋرەن تەمىربەكوۆ ايتقانداي، بيىل 1- تامىزعا دەيىن «ۇلتتىق قور» اۋديتىنىڭ قورىتىندىسى بويىنشا جىلدىق ەسەپتى بەكىتۋ جوسپارلانۋدا.

اۋديت دەرەكتەرىنىڭ نەگىزىندە ۇلتتىق بانك 1- قىركۇيەككە دەيىن ءبىرىڭعاي جيناقتاۋشى زەينەتاقى قورىنا (ب ج ز ق) «ۇلتتىق قوردىڭ» ورتاشا ينۆەستيتسيالىق تابىسىنىڭ 50 پايىزى سوماسى تۋرالى، سونداي-اق جىل سايىن وسى سوماعا ەسەپتەلەتىن ورتاشا ينۆەستيتسيالىق تابىستىڭ سوماسى مەن ستاۆكاسى تۋرالى اقپارات جىبەرىلەدى.

سونداي-اق، مينيستر ورىنباسارىنىڭ مالىمدەۋىنشە، بيىل 31- جەلتوقسانعا دەيىن ءبىرىڭعاي جيناقتاۋشى زەينەتاقى قورى (ب ج ز ق) جەكە تۇلعالار تۋرالى مەملەكەتتىك دەرەكقوردان قاجەتتى اقپاراتتى يمپورتتايدى.

ال 2024-جىلعى 20- قاڭتارعا دەيىن ب ج ز ق الىنعان اقپاراتتى ادىلەت مينيسترلىگىمەن كەلىسەدى جانە جوبانىڭ ءار قاتىسۋشىسى بويىنشا ۇلتتىق قوردىڭ ينۆەستيتسيالىق كىرىسىنىڭ سوماسىن ەسەپتەيدى.

ەسكە سالا كەتەيىك، مەملەكەت باسشىسى وتكەن جىلعى حالىققا جولداۋىندا «ۇلتتىق قور - بالالارعا» باعدارلاماسىن قولعا الۋ كەرەكتىگىن ايتقان ەدى.

ول باعدارلاما اياسىندا ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ارناۋلى جيناقتاۋشى ەسەپشوتىنا اۋدارىلادى.

تولەم ءار بالا 18 جاسقا تولعانشا جەكە شوتىنا تۇسەدى.