بالۋان ايبەك سەرىكبايەۆ «سىر بارىسى» اتاندى

قىزىلوردا. قازاقپارات - قىزىلوردا وبلىسىندا «قازاقستان بارىسى» رەسپۋبليكالىق تۋرنيرىنە وبلىستىق ىرىكتەۋ سايىسى ءوتىپ، ايبەك سەرىكبايەۆ «سىر بارىسى» اتاندى، دەپ حابارلايدى قازاقپارات ءتىلشىسى.

وبلىس ورتالىعىنداعى «ەۋرازيا» سپورت كەشەنىندە رەسپۋبليكالىق «قازاقستان بارىسى» تۋرنيرىنە وبلىستىق ىرىكتەۋ سايىسى ءوتتى.

جارىستىڭ اشىلۋ سالتاناتىندا وبلىس اكىمى اپپاراتىنىڭ باسشىسى شاحماردان بايمانوۆ بالۋاندارعا ساتتىلىك تىلەپ، قىزىقتى سايىس وتۋىنە تىلەكتەستىگىن ءبىلدىردى.

ودان كەيىن ق ر ەڭبەك سىڭىرگەن جاتتىقتىرۋشى، وبلىستىق ءماسليحات دەپۋتاتى سادىق مۇستافا ءداستۇرلى تۋرنيردىڭ 2011-جىلى العاش رەت سىر وڭىرىندە باستاۋ العانىن اتاپ ءوتتى.

العاشقىدا وبلىستىق دەڭگەيدە وتكىزىلگەن سايىس ۋاقىت وتە كەلە رەسپۋبليكالىق دەڭگەيگە كوتەرىلدى.

بيىل ون ءتورتىنشى مارتە جالاۋىن جەلبىرەتكەن تۋرنير جۇرتشىلىق اراسىندا كەڭىنەن قولداۋعا يە بولدى.

وبلىستىق اقتىق جارىسقا الدىمەن ىرىكتەۋ اۋىل، اۋداندىق دەڭگەيدە ءوتىپ، كىشى جاس وسپىرىمدەر، جاس وسپىرىمدەر، جاستار جانە ەرەسەكتەر اراسىنداعى 4 جاس ەرەكشەلىگى بويىنشا ىرىكتەلدى.

جارىس قورىتىندىسى بويىنشا وبلىستىق ىرىكتەۋ سايىسى فينالىندا ايبەك سەرىكبايەۆ پەن ەلامان ەرعاليەۆ كەزدەستى. تارتىستى وتكەن باسەكەدە ايبەك جەڭىسكە جەتتى.

قوس بالۋان ەندى رەسپۋبليكالىق «قازاقستان بارىسى» تۋرنيرىندە وبلىس نامىسىن قورعايدى.

ەسكە سالساق، بۇدان بۇرىن باتىس قازاقستان وبلىسىندا «جايىق بارىسى» انىقتالعان بولاتىن.