مايمىل شەشەگىنەن قاۋىپ جوق - د د س ۇ

استانا. قازاقپارات - مايمىل شەشەگىنەن ەندى قاۋىپ جوق. دۇنيەجۇزىلىك دەنساۋلىق ساقتاۋ ۇيىمى بىلتىر جاريالانعان توتەنشە جاعداي رەجيمىن الىپ تاستادى.

بۇل تۋرالى حالىقارالىق قاۋىمداستىقتىڭ باسشىسى تەدروس گەبرەيەسۋس ءوزى جاريا ەتتى. ال كوروناۆيرۋس سياقتى مايمىل شەشەگىنە قاتىستى جۇمىستار جۇيەلى جۇرگىزىلە بەرمەك. جالپى ىندەت تاراعالى دۇنيەجۇزىلىك دەنساۋلىق ساقتاۋ ۇيىمىنا 110 ەلدە 90 مىڭعا جۋىق ادامنىڭ ونى جۇقتىرعانى جانە 140 تۇرعىننىڭ كوز جۇمعانى تۋرالى اقپارات تۇسكەن. مايمىل شەشەگى اسىرەسە ورتالىق جانە باتىس افريكا ەلدەرىندە قاتتى ءورشىدى. بۇل اۋرۋعا شالدىققان ناۋقاستىڭ دەنە قىزۋىنىڭ كوتەرىلىپ، جۇرەگى لوقسىپ، بۇلشىق ەتتەرى اۋىرادى جانە قىشىما پايدا بولادى.

تەدروس گەبرەيەسۋس، د د س ۇ باس ديرەكتورى:

- مايمىل شەشەگىنە قارسى كۇرەس وڭ ناتيجەسىن بەرگەنىن كورىپ وتىرمىز. سوڭعى 3 ايدا اتالعان اۋرۋعا بايلانىستى شاعىم كولەمى 90 پايىزعا ازايعان. سوندىقتان بۇل ىندەتتەن الەمگە تونگەن قاۋىپ جوق دەپ ەسەپتەيمىز.

www.24.kz