اشەكەيلەر، جەر اۋماقتارى، ۆاليۋتالار - مەملەكەتكە قايتارىلعان اكتيۆتەر قايدا جۇمسالادى

استانا. قازاقپارات - اكتيۆتەردى قايتارۋ بويىنشا ۆەدومستۆوارالىق كوميسسيانىڭ رەسمي وكىلى زەيىن الىپبەك قايتارىلعان اكتيۆتەردىڭ قايدا جۇمسالاتىنىن ايتىپ بەردى، دەپ حابارلايدى قازاقپارات ءتىلشىسى.

«كوميسسيا جۇمىسىنىڭ ناتيجەسىندە بۇگىنگى كۇنگە دەيىن 760 ميلليارد تەڭگە قايتارىلدى. بۇل كوميسسيا جۇمىسقا كىرىسكەن 7-8 ايدىڭ ناتيجەسى جانە بۇل سانداردىڭ كوبەيەتىنى ءسوزسىز. اتالعان سوما دۇنيە- مۇلىك تۇرىندە، اكتيۆ تۇرىندە جانە ۆاليۋتا تۇرىندە قايتارىلىپ جاتىر. بۇل اكتيۆتەر ليحتەنشتەين، اۋستريا، بىرىككەن اراب امىرلىكتەرىنەن كەلۋدە»، - دەدى زەيىن الىپبەك باس پروكۋراتۋرا كۋلۋارىندا تىلشىلەرگە بەرگەن سۇحباتىندا.

ونىڭ ايتۋىنشا، قايرات ساتىبالدى ۇلىنا بايلانىستى ونداعان ميلليون دوللاردىڭ اشەكەي زاتتارى قايتارىلدى، 360 ميلليارد تەڭگە مەملەكەتكە كەلگەن تىكەلەي زالال وتەلدى.

سونداي- اق، قىلمىستىق ىستەردىڭ فيگۋرانتتارى 172 ميلليارد تەڭگەنى ءوز ەركىمەن مەملەكەتكە قايتارىپ بەرگەن.

«قايتارىلعان اكتيۆتەر ەلىمىزدىڭ ءار سالاسىنا جىبەرىلەدى. مىسالى سالىقتان جالتارۋلار بولسا، ءبىزدىڭ كوميسسيا 100 ميلليارد تەڭگەنىڭ سالىعىن قايتاردى، ول سالىق ورگاندارىنىڭ ءوز شوتىنا تۇسەدى. وعان قوسا زاڭسىز الىنعان، ءوز ماقساتىنا پايدالانىلماعان 460 مىڭ گەكتار جەر قايتارىلدى. بۇل دا ءار اۋىلدىڭ، ءار اۋماقتىڭ مەنشىگىنە قايتارىلادى. تاركىلەنگەن باسقا دا مۇلىكتەردى قايدا جىبەرۋ كەرەگى تالقىلانىپ جاتىر»، - دەدى ز. الىپبەك.

ايتا كەتەيىك، باس پروكۋراتۋرادا ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس- قيمىل ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسى ءوتتى. تۇتاستاي العاندا، مەملەكەتكە ورتاق كۇش- جىگەرمەن 760 ميلليارد تەڭگەدەن استام سوماعا اكتيۆتەر قايتارىلدى، ونىڭ ىشىندە شەتەلدىك يۋريسديكتسيالاردان 575 ميلليون دوللار كەلگەن.

اۆتور: ايجان سەرىكجان قىزى