وپەراتسيالىق مەدبيكە بولۋ اركىمنىڭ قولىنان كەلمەيتىن كۇردەلى ماماندىق - ارزۋگۋل حايرۋللايەۆا
الماتى قالاسى №4-پەرزەنتحاناسىندا ءدال وسىنداي مەدبيكەلەر جۇمىس ىستەيدى. سولاردىڭ ءبىرى پەرزەنتحانانىڭ وپەراتسيالىق مەدبيكەسى ارزۋگۋل حايرۋللايەۆا. بۇگىنگى كاسىبي مەرەكەگە وراي مەدبيكە ءوز جۇمىسىنىڭ قىر سىرى تۋرالى ايتىپ بەردى.
ارزۋگۋل حايرۋللايەۆا ءوز ماماندىعى بويىنشا 23 جىل جۇمىس ىستەپ كەلەدى. سوڭعى 7-8 جىل ىشىندە اكۋشەر- گينەكولوگتەرگە وپەراتسيا كەزىندە كومەكتەسىپ، كۇن سايىن ومىرگە جاڭا كەلگەن نارەستەلەردى كورىپ جۇرگەن جان. وپەراتسيالىق بلوكتا مەدبيكە دارىگەرلەردىڭ تاپتىرماس كومەكشىسى. ولار پاتسيەنتتەردى وپەراتسياعا دايىندايدى جانە وپەراتسيا كەزىندە دارىگەرمەن بىردەي ءيىن تىرەسە ەڭبەك ەتەدى.
«وپەراتسيالىق مەدبيكە - بۇل حيرۋرگيالىق توپتىڭ بارلىق مۇشەلەرىن بايلانىستىراتىن بۋىن. ول بۇكىل وپەراتسيانىڭ بارىسىن ءبىلىپ قانا قويماي، حيرۋرگكە قاي ۋاقىتتا قانداي قۇرال بەرۋ كەرەكتىگىن ءتۇسىنۋى كەرەك. كۇردەلى وپەراتسيالار كوبىنەسە تولىق تىنىشتىقتا وتەدى. حيرۋرگ وعان قۇرالداردىڭ ىشىنەن نە قاجەت ەكەنىن ءالى ايتپاسا دا، مەيىربيكەنىڭ ءبىلىپ بەرگەن كەزدەرى دە بولادى. مەدبيكەنىڭ كاسىبيلىگى شۇعىل جاعدايلاردا وتە ماڭىزدى، ول كەزدە بارلىق جاعدايدى باعالاۋ جانە وپەراتسياعا دايىنداۋ ءۇشىن بىرنەشە سەكۋندتار جەتكىلىكتى بولۋى مۇمكىن. وپەربلوكتىڭ مامانى بولۋ اركىمنىڭ قولىنان كەلە بەرمەيدى. بۇل قيىن جۇمىس، ءبىراق ول جۇرەكتىڭ قالاۋىمەن تاڭدالاتىن ماماندىق. سونىمەن قاتار، حيرۋرگيالىق توپتىڭ قۇرامىنداعى جاۋاپكەرشىلىكتىڭ اۋىرلىعىن ناقتى ءبىلۋ قاجەت. بۇل قىزمەتكە كەلەتىندەر كوپ، ءبىراق ءبارى بىردەي پسيحوەموتسيونالدى جانە فيزيكالىق بەلسەندىلىككە توتەپ بەرە بەرمەيدى. ءبىزدىڭ جۇمىسىمىز تەپە-تەڭدىكتى، ەموتسيالاردى ۇستاي ءبىلۋدى، سونداي-اق، جوسپارلى وپەراتسيالاردان شۇعىل وپەراتسيالارعا اۋىسۋ قابىلەتىن تالاپ ەتەدى. ال پەرزەنتحانادا جۇمىس ىستەگەندە، بۇل ەكى ادامنىڭ، ياعني، انا مەن بالانىڭ ءومىرى سەنىڭ جاۋاپكەرشىلىگىڭدە بولادى»، - دەيدى ارزۋگۋل حايحايرۋللايەۆا.
وپەراتسيا جاسايتىن مەدبيكە كۇنىنە 3 حيرۋرگيالىق ارالاسۋعا قاتىسادى. ول وپەراتسيا وتەتىن بولمەنى وڭدەپ دايىندايدى، ناۋقاستى وپەراتسياعا دايىندايدى، ونىڭ وپەراتسيا بولمەسىنە ۋاقىتىندا جەتكىزىلۋىن، سونداي-اق، ستەريلدىلىك ايماقتارىنا سايكەس حيرۋرگيالىق توپ مۇشەلەرىنىڭ قوزعالىسىن قاداعالايدى. ول ناۋقاسقا وپەراتسيادان كەيىنگى ەرتە كۇتىم جاسايدى، سونىمەن قاتار، وپەراتسيادان كەيىنگى اسقىنۋلاردىڭ بولماۋىن قاداعالايدى.
ارزۋگۋل حايرۋللايەۆانىڭ ايتۋىنشا، مەدبيكە شۇعىل جاعدايلاردا العاشقى مەديتسينالىق كومەك كورسەتۋگە ءارقاشان دايىن بولۋى كەرەك.
«ءبىز الداعى تاۋلىكتە قانداي وپەراتسيالار بولاتىنىن بىلمەي، اۋىسىمعا بارامىز. مۇندا نەمقۇرايدىلىق پەن قاتەلىككە جول بەرىلمەيدى. وپەراتسيانىڭ ناتيجەسى حيرۋرگ پەن رەانيماتولوگتىڭ ارەكەتىنە عانا بايلانىستى ەمەس. بارلىق وپەراتسيالىق مەدبيكەلەردى مەرەكەمەن شىن جۇرەكتەن قۇتتىقتايمىن. اماندىق، دەنساۋلىق جانە كاسىبي ءوسۋدى تىلەيمىن»، - دەدى ارزۋگۋل حايرۋللايەۆا.
