قاراعاندى اكىمى تىكەلەي ەفيردە كراننان اققان سۋدى ءىشىپ، ساپاسىن سىناپ كوردى

قاراعاندى. قازاقپارات - قاراعاندى قالاسىنىڭ اكىمى «قاراعاندى سۋ» ج ش س سورعى ستانسياسىندا بولىپ قايتتى.

قالا باسشىسى كومپانيا وكىلدەرىمەن بىرگە تۇرعىندار تاراپىنان اۋىز سۋدىڭ ساپاسىنا قاتىستى شاعىمدارىن نازارعا الىپ، ءمان- جايدى انىقتاۋ ءۇشىن ستانتسيانىڭ جۇمىسىن تەكسەردى، دەپ حابارلايدى قازاقپارات ءتىلشىسى.

كەشە قاراعاندى اكىمى مەيرام كوجۋحوۆ «قاراعاندى سۋ» ج ش س سورعى ستانسياسىندا بولدى.

ساپاردىڭ باستى ماقساتى - تازارتۋ قوندىرعىسى مەن سۋ تارتۋدىڭ جۇمىسىن تەكسەرۋ. سوڭعى ۋاقىتتا قالا حالقى تاراپىنان اۋىز سۋدىڭ ساپاسىنا شاعىمدار جيىلەپ كەتكەن.

قالا باسشىسى بارلىق پروتسەستى Instagram پاراقشاسى ارقىلى تىكەلەي ەفيردە كورسەتتى.

سورعى ستانتسياسىنىڭ قىزمەتكەرلەرى تۇسىندىرگەندەي، قالانى اۋىز سۋمەن قامتاماسىز ەتۋ ءۇشىن ستانتسيا تاۋلىگىنە 11 دەن 22 مىڭ تەكشە مەترگە دەيىن سۋ وتكىزەدى.

سۋ ق. ساتبايەۆ اتىنداعى كانالدان الىنادى. بۇل - ۇزىندىعى 500 ك م جاساندى سۋ قۇرىلىمى.

قالا اكىمىنە تازارتۋ عيماراتىندا «قاراعاندى سۋ» كومپانياسىنىڭ باسشىسى سۋ تازارتۋ كەشەنى بويىنشا ەكسكۋرسيا وتكىزدى.

سودان كەيىن ولار تۇتىنۋشىلارعا جەتكىزىلەتىن سۋدىڭ ءدامىن تاتىپ كوردى.

«قالاداعى قۇبىرلارعا باراتىن سۋدى سىناپ كورەيىك. ارينە، بورجومي سەكىلدى ەمەس، ءبىراق سوعان جاقىن»، - دەدى قالا باسشىسى.

سونداي-اق، قالا اكىمى كەيبىر تۇرعىندار الەۋمەتتىك جەلىلەردە جاريالاعان مالىمەتتى جوققا شىعارىپ، سۋدىڭ جاعىمسىز ءدامى، قوسپا مەن قۇرتتار جوق ەكەنىن اتاپ ءوتتى.

ەستەرىڭىزگە سالا كەتەيىك، «قاراعاندى سۋ» - قالانى اۋىز سۋمەن قامتاماسىز ەتەتىن كومپانيا.

كاسىپورىندا 1700 دەن استام قىزمەتكەر جۇمىس ىستەيدى.

كومپانيانىڭ يەلىگىندە 18 پايدالانۋ ۋچاسكەسى، 15 مەنشىكتى قوسالقى ستانسيا جانە 96 سورعى ستانسياسى، ونىڭ ىشىندە 10 كارىز سورعى ستانسياسى بار.

سۋمەن جابدىقتاۋ جەلىلەرىنىڭ جالپى ۇزىندىعى 1200 ك م، كارىز - 800 ك م.

كومپانيا باسشىسىنىڭ ايتۋىنشا، سوڭعى 10 جىلدا 750 ك م سۋ بۇرۋ جەلىلەرى جوندەلگەن.