مەدەۋدى شارپىعان ءورت قاشان تولىق سونەدى

الماتى. قازاقپارات - الماتى قالاسىنىڭ توتەنشە جاعدايلار دەپارتامەنتى باسشىسىنىڭ مىندەتىن ۋاقىتشا اتقارۋشى سامات اساينوۆ مەدەۋدەگى ءورت قاشان تولىق اۋىزدىقتالاتىنىن ايتتى، دەپ حابارلايدى قازاقپارات ءتىلشىسى.

ايتۋىنشا، ءورت 8-مامىر كۇنى ساعات 17:53 تە وقشاۋلانعان.

قازىر قۇتقارۋشىلار اعاشتاردىڭ ورتەنگەن قالدىقتارى مەن تامىرلاردى ارالاۋمەن اينالىسىپ جاتىر.

«بۇگىن ءبىز ىلە الاتاۋى ۇلتتىق پاركىنىڭ باسشىلىعىمەن سويلەستىك. مەنىڭ ويىمشا، ءورت تولىق جۇمىس كۇنىنىڭ سوڭىنا دەيىن نەمەسە ەرتەڭ سونەدى دەپ ويلايمىن. ولار ەرتەڭ بۇل اۋماقتا قايتا ءورت بولمايتىنىنا تولىق سەنىمدى بولعان كەزدە جالىن اۋىزدىقتالعانىن حابارلايدى» ، - دەدى سامات اساينوۆ.

ءورت ءسوندىرۋ جۇمىسىنا ىلە الاتاۋى ۇلتتىق پاركىنىڭ 35 قىزمەتكەرى، قازسەلدەنقورعاۋ مەكەمەسىنىڭ 15 مامانى، سونداي- اق ت ج د ءتورت قىزمەتكەرى جۇمىلدىرىلدى.

بۇعان دەيىن ول الاپات ءورتتىڭ شىعۋىنا ادام فاكتورى سەبەپ بولۋى مۇمكىن ەكەنىن ايتقان ەدى.

ەسكە سالايىق، 7-مامىر تۇنگى ساعات 23.00 شاماسىندا ىلە الاتاۋى مەملەكەتتىك ۇلتتىق تابيعي پاركى كىشى الماتى ورمانشىلىعى 33 اۋماعىنان ءورت شىققان بولاتىن.

جالىنمەن كۇرەسكە ءورت سوندىرۋشىلەر، بىرنەشە تەحنيكا مەن تىكۇشاق جۇمىلدىرىلعان.

تۇتانعان وتپەن كۇرەس كەزىندە ءورت ءسوندىرۋشى ارسلان قۇرمانبەكوۆ مەرت بولدى.

كەيىن الماتى قالالىق توتەنشە جاعدايلار دەپارتامەنتى قازا تاپقان قىزمەتكەر ارسلان قۇرمانبەكوۆتىڭ وتباسىنا 13 ميلليون تەڭگە وتەماقى بەرىلەتىنىن ايتتى.