قارايعان بانانداردا قۇرت بولاتىنى راس پا؟

استانا. قازاقپارات - قازنەتتە قۇرتتارى بار باناننىڭ ۆيدەوسى تارادى. بەلگىسىز بىرەۋ ونىڭ ءبىر بولىگىن ميكروسكوپقا قويىپ، لينزا ارقىلى وندا قۇرتتار بار ەكەنىن كورسەتەدى.

ۆيدەو قانشالىق شىنايى بولىپ كورىنگەنىمەن، بۇل - فەيك، - دەپ حابارلايدى stopfake.kz.

ۋكراينالىق حيميك گلەب رەپيچ پىسكەن بانانمەن وسىنداي تاجىريبە جاساپ، ونى ءوزىنىڭ Instagram-پاراقشاسىندا كورسەتكەن. ول قوڭىر باناندى ميكروسكوپپەن قاراپ، ەشقانداي قۇرت تاپپاعان. سودان كەيىن رەپيچ جەمىستىڭ ىلبىراعان بولىگىن الىپ، ميكروسكوپپەن قارايدى، وندا دا پارازيتتەر بولماعان. عالىم ءوزىنىڭ تاجىريبەسىنە سۇيەنە وتىرىپ، بانان مەن قۇرتتىڭ تارالعان ۆيدەوسى وتىرىك دەگەن قورىتىندىعا كەلدى.

باناننىڭ ءپىسۋ دارەجەسى ءارتۇرلى بولادى. دەگەنمەن قوڭىر باناندارداعى قورەكتىك زاتتاردىڭ مولشەرى سارى جەمىستىڭ قۇرامىنان ايتارلىقتاي ەرەكشەلەنبەيدى. تىم پىسكەن جەمىستەردە دە پايدالى زاتتار بار. ءبىراق قوڭىر بانانىڭ قۇرامىندا قانت الدەقايدا كوپ، ويتكەنى تالشىقتاردىڭ ىدىراۋى كەزىندە ونداعى كۇردەلى كراحمالدار جاي قانتقا اينالادى.

الايدا جەمىس كوگەرىپ كەتسە، ودان جاعىمسىز ءيىس شىقسا نەمەسە سۇيىقتىق بولىنسە، دەمەك، ول - ءشىرىپ كەتتى دەگەن ءسوز جانە ونى جەۋگە بولمايدى.

ياعني، ىلبىراعان بانانداعى قۇرتتاردىڭ ۆيدەوسى - فەيك. قوڭىر بانانداردى جەۋ قاۋىپسىز. سونىمەن قاتار، ولاردىڭ قۇرامىندا كادىمگى پىسكەن بانانداعىداي دارۋمەندەر مەن انتيوكسيدانتتار بولادى، تەك ازىراق مولشەردە. سوندىقتان بانان كوگەرمەگەن بولسا جانە ودان جاعىمسىز ءيىس شىقپاسا، ونى تۇسىنە قاراماستان، جەۋگە بولادى.