جەڭىس شەرۋىنە بارعان لۋكاشەنكو ماسكەۋدەن شۇعىل كەتۋگە ءماجبۇر بولعان
ب ا ق مالىمەتىنشە، اۋەجايدان ونى جەدەل جاردەم كولىگىمەن الىپ كەتكەن.
سالتاناتتى راسىمنەن كەيىن ت م د پرەزيدەنتتەرى جاياۋ سەرۋەندەۋ ءۇشىن الەكساندر باعىنا بەت العان. ارالارىندا تەك الەكساندر لۋكاشەنكو عانا ەلەكتروموبيلمەن جەتكىزىلگەن. ال سەرۋەننەن كەيىن مەملەكەت باسشىلارى كرەملدەگى بەيرەسمي تاڭعى اسقا جينالعاندا ولاردىڭ قاتارىندا بەلارۋس پرەزيدەنتى بولعان جوق.
EADaily باسىلىمى جەڭىس كۇنىنە وراي وتكەن شەرۋدەن كەيىن ونىڭ ناۋقاستانىپ قالعانىن حابارلادى. دەنساۋلىعىنىڭ ناشارلاۋىنا بايلانىستى لۋكاشەنكو شۇعىل تۇردە ماسكەۋدەن كەتۋگە ءماجبۇر بولعان.
اۋەجايدا 68 جاستاعى الەكساندر گريگوريەۆيچ رەسەي پرەزيدەنتى ۆلاديمير پۋتينمەن بىرگە تۇسكى استى ەمەس، جەدەل جاردەم كولىگىن كۇتىپ وتىرعان، - دەلىنگەن اقپاراتتا.
ال «بەلسات» باسىلىمىنىڭ Telegram-ارناسى لۋكاشەنكونىڭ شەرۋ بارىسىندا قولى تاڭىلعانىن جازدى. سونىمەن قاتار، شەرۋ كەزىندەگى سالتاناتتى راسىمدە پرەزيدەنتتىڭ ورنىنا بەلارۋس رەسپۋبليكاسىنىڭ قورعانىس ءمينيسترى ۆيكتور حرەنين ءسوز سويلەدى.
ب ا ق- تىڭ حابارلاۋىنشا، لۋكاشەنكو بۇل جولى جەڭىس كۇنىنە وراي وتكەن شەرۋدە العاش رەت ءسوز سويلەمەگەن. الايدا ازىرگە ونىڭ دەنساۋلىعىنا قاتىستى رەسمي مالىمدەمە دە، تۇسىنىكتەمە دە جوق. باسپا ءسوز قىزمەتى دە ب ا ق- تا تاراعان اقپاراتقا ەشقانداي تۇسىنىك بەرمەگەن.
