استانادا قۇتقارۋشىلار قۇرىلىسى بىتپەگەن ءۇيدىڭ سىرتقى قاپتاماسىنداعى ورتپەن الىسىپ جاتىر

استانا. قازاقپارات - استانادا ءورت سوندىرۋشىلەر سالىنىپ جاتقان تۇرعىن ۇيدەگى ءتىلسىز جاۋمەن الىسىپ جاتىر، دەپ حابارلايدى قازاقپارات ءتىلشىسى قالالىق توتەنشە جاعدايلار دەپارتامەنتىنىڭ باسپا ءسوز قىزمەتىنە سىلتەمە جاساپ.

«11-مامىر كۇنى ساعات 15.01 شاماسىندا استانا قالاسى توتەنشە جاعدايلار دەپارتامەنتى ءورت ءسوندىرۋ بولىمشەلەرىنە اقمەشىت- سىعاناق كوشەلەرىنىڭ قيىلىسىندا جاڭا عيماراتتان قارا ءتۇتىن كورىنىپ تۇرعانى تۋرالى حابار ءتۇستى. وقيعا ورنىنا جەتكەن ءورت سوندىرۋشىلەر سالىنىپ جاتقان تۇرعىن ءۇي كەشەنىنىڭ اۋماعىندا بيتۋم جانە سىرتقى قاپتامانىڭ جانىپ جاتقانىن انىقتادى» ، - دەلىنگەن حابارلامادا.

اقپاراتتا ايتىلعانداي، ءتىلسىز جاۋ ساعات 15.17 دە وقشاۋلاندى.

زارداپ شەككەندەر جانە قازا بولعاندار جوق.

ەسكە سالا كەتەيىك، ءبىراز ۋاقىت بۇرىن ەلوردانىڭ سول جاعالاۋىندا سالىنىپ جاتقان تۇرعىن ءۇي كەشەنى وتقا ورانعانىن حابارلاعان ەدىك.