بيىل مۇلىك يەلەرى بىرلەستىگى تۋرالى زاڭناما قايتا قارالادى - ماۋلەن اشىمبايەۆ
«بۇگىن ءبىز مۇلىك يەلەرى بىرلەستىگى ءتيىستى دەڭگەيدە جۇمىس ىستەمەي وتىرعانىن كورىپ وتىرمىز. تۇرعىندار اراسىندا كەلىسپەيتىن جاعدايلار بار. ءبىز مۇنى ءجيى ەستيمىز. مۇلىك يەلەرى بىرلەستىگىنە باسشىلىققا كەلگەندەر اراسىندا دا ءوز قىزمەتىن ادال اتقارمايتىندار كەزدەسەدى. سوندىقتان بۇل سالا بويىنشا ەل پرەزيدەنتىنىڭ تاپسىرماسى بار. مەنىڭ ويىمشا، الداعى كەزەڭدە ءبىز جالپى مۇلىك يەلەرى بىرلەستىگى تۋرالى زاڭ جوباسىنا قايتا ورالامىز. وسى ورايدا كەيبىر ماسەلەگە قاتىستى وزگەرتۋلەر بولۋى مۇمكىن. اتاپ ايتقاندا، وزگەرىس ەنگىزەتىن قادامداردى حالىقپەن، تۇرعىندارمەن، قوعام بەلسەندىلەرىمەن اقىلداسۋ كەرەك. سوندىقتان ءتيىمدى بولاتىنداي تۇرعىن ۇيلەردى باسقارۋدىڭ قانداي دا ءبىر ءتۇرىن قابىلداۋ كەرەك»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇل رەتتە ول وزگەرىستەر قاشان ەنگىزىلۋى مۇمكىن ەكەنىن ايتتى.
«جىل ىشىندە ۇسىنىستار پىسىقتالادى. بيىلدىڭ سوڭىنا دەيىن زاڭ قابىلدانۋى كەرەك»، - دەدى سەنات ءتوراعاسى.
بۇدان بۇرىن حابارلانعانداي، بيىل ءساۋىر ايىندا مەملەكەت باسشىسى قاسىم-جومارت توقايەۆ مۇلىك يەلەرى بىرلەستىگى ينستيتۋتىن ەنگىزۋگە باعىتتالعان رەفورما سوڭىنا دەيىن جەتكىزىلمەگەنىن سىنعا العان ەدى.
