الماتى: ناۋرىزباي اۋدانىندا كارەر جۇمىسىنان جەرگىلىكتى تۇرعىندار جاپا شەگۋدە

الماتى. قازاقپارات - «اقجار» تۇرعىندارى قۇم، تاس وندىرەتىندەرگە شاعىمداندى، دەپ حابارلايدى قازاقپارات ءتىلشىسى.

ناۋرىزباي اۋدانى تۇرعىندارىنىڭ ءبىرى كەزدەسۋ بارىسىندا ەربولات دوسايەۆتان تۇرعىن ءۇي اۋماعىنداعى كارەردىڭ يەلەرىنە شارا قولدانۋدى سۇرادى.

ايتۋىنشا، «اقجار» شاعىناۋدانىنىڭ بويىندا ءۇش كارەر بار. سونىڭ سالدارىنان قالا تۇرعىندارىنىڭ دەنساۋلىعى ناشارلاپ بارادى.

«ولاردىڭ ليتسەنزياسى بىلتىر اياقتالدى. سونىمەن قاتار، ءۇش ايعا جۇمىس ىستەۋىنە تىيىم سالىنعان بولاتىن. الايدا ءالى دە جۇمىس ىستەپ تۇر. وسىنىڭ كەسىرىنەن بالالارىمىز اللەرگيا، ونكولوگيادان زارداپ شەگەدى»، - دەيدى اۋدان تۇرعىنى.

اكىم ەربولات دوسايەۆتىڭ ايتۋىنشا، كارەرلەر الماتى وبلىسىنىڭ اۋماعىندا ورنالاسقان.

«بىلتىر وبلىس اكىمىمەن سويلەسكەن بولاتىنبىز. مەن سۇراقتى تاعى دا كوتەرەمىن. ءبىراق، وكىنىشكە وراي، يۋريسديكتسيا الماتى قالاسىنا قارامايدى»، - دەپ جاۋاپ بەردى اكىم.

ناۋرىزباي اۋدانىنىڭ اكىمى سانجار توعاي بۇل ماسەلەنى الماتى وبلىسىنىڭ اكىمدىگىمەن بىرنەشە رەت تالقىلاعانىن اتاپ ءوتتى.

«الماتى وبلىسى كارەرمەن كەلىسىمشارتتى توقتاتتى. 2021 -جىلى كارەر باسشىلىعى ءوز مەرزىمدەرىن قالپىنا كەلتىرىپ، ءارى قاراي جۇمىسىن جالعاستىرا باستادى»، - دەدى ول.

ەربولات دوسايەۆ كارەرلەردىڭ بىرنەشە جىلدان بەرى جۇمىس ىستەپ تۇرعانىن تىلگە تيەك ەتتى.

«وبلىس اكىمىمەن بىرگە جۇمىس ىستەيتىن بولامىز. بۇرىن سوت شەشىمى بولسا، ەندى اپەللياتسيالىق شاعىم تۇسىرەتىن شىعارمىز. الماتى وبلىسىنىڭ اكىمىنە رەسمي تۇردە جۇگىنەمىن»، - دەپ قوستى ەربولات دوسايەۆ.

سونداي- اق ول سانيتارلىق- ەپيدەميولوگيالىق باقىلاۋ دەپارتامەنتىنە ءتيىستى ساراپتامالار جۇرگىزۋدى تاپسىردى.

بۇعان دەيىن الماتىدا زاڭسىز كارەر جابىلعانى تۋرالى جازعان بولاتىنبىز.