ماۋلەن اشىمبايەۆ قىتايمەن ۆيزاسىز رەجيمگە قاتىستى پىكىر ءبىلدىردى

استانا. قازاقپارات – ق ر پارلامەنتى سەناتىنىڭ ءتوراعاسى ماۋلەن اشىمبايەۆ قىتايمەن اراداعى ۆيزاسىز رەجيمگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ۆيزاسىز رەجيمگە قاتىستى حالىققا دۇرىس ءتۇسىندىرۋ كەرەك. قازىرگى كەزدە قازاقستان 50-گە جۋىق مەملەكەتتىڭ ازاماتتارىنا شەكتەۋلى ۋاقىتقا ۆيزاسىز كەلۋگە مۇمكىندىك بەرگەن. ولاردىڭ اراسىندا ا ق ش، ەۋروپا مەن ازيانىڭ ەلدەرى قامتىلعان. بۇل شەشىم ەلىمىزگە تۋريستەردى تارتۋ جانە بيزنەس اياسىندا كەلىپ جاتقان ادامدارعا ءتيىستى مۇمكىندىك جاساۋ باعىتىندا ەسكەرىلدى. اتاپ ايتقاندا، اتالعان رەجيم شەكتەۋلى ۋاقىتقا ارنالعان، سونداي- اق ونىڭ اياسىندا جۇمىس ىستەۋگە جانە قازاقستاندا تۇراقتى قالۋعا بولمايدى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

وسى ورايدا ول مۇنداي رەجيم كەيىنگى جىلدارى قىتايعا دا قاتىستى قابىلدانعانىن ەسكە سالدى.

«كەيىنگى جىلدارى قىتاي ازاماتتارىنىڭ قازاقستانعا 14 كۇنگە ۆيزاسىز كىرۋگە مۇمكىندىگى بار. بۇل شەشىم پاندەمياعا دەيىن قابىلدانعان ەدى. ياعني، بىرنەشە جىلدان بەرى ەۋروپا مەن قىتاي جانە باسقا ەلدەردىڭ ازاماتتارىنا وسىنداي مۇمكىندىك جاسالدى. قازىر ەلىمىزدىڭ سىرتقى ىستەر مينيسترلىگى قازاقستان ازاماتتارىنىڭ قىتايعا ۆيزاسىز بارۋى تۋرالى ماسەلەنى كوتەرىپ جاتىر. وسى ورايدا ءتيىستى كەلىسسوز ءجۇرىپ جاتىر. بۇل تۇرعىدا ءبىزدىڭ ازاماتتارعا ءتيىستى جاعداي جاساۋعا ارنالعان»، - دەدى سەنات ءتوراعاسى.

سونىمەن قاتار م. اشىمبايەۆ قازاقستانعا ۆيزاسىز تارتىپپەن كەلگەن شەتەل ازاماتتارىنا جۇمىسقا ورنالاسۋعا، ەلىمىزدە قالۋعا رۇقسات ەتىلمەيتىنىن ايتتى. بۇل ءتارتىپ بۇزىلسا، ولار جاۋاپقا تارتىلادى. وسى رەتتە تۋريزم، كاسىپكەرلىك باعىتىندا جانە تۋىستارىنا كەلۋگە عانا رۇقسات بەرىلەدى.

بۇدان بۇرىن حابارلانعانداي، سىرتقى ىستەر مينيسترلىگى ەلىمىز بەن قىتاي اراسىندا ورناۋى مۇمكىن ۆيزاسىز رەجيمگە تۇسىنىك بەردى.

جاقىندا ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قىتايمەن اراداعى ۆيزاسىز رەجيمگە قاتىستى پىكىر ءبىلدىردى.

«كەيىنگى كەزدەرى قوعامدا قىتاي مەن قازاقستان اراسىنداعى ۆيزاسىز رەجيمگە قارسى پىكىرلەر ايتىلىپ جاتىر. بۇل كەلىسىمگە قول قويىلمادى. وعان قول قويىلسا عانا كۇشىنە ەنەدى. ەكىنشىدەن، بىلتىر جازدان بەرى قىتاي ازاماتتارى قازاقستانعا 14 كۇنگە ۆيزاسىز كەلە الادى. كەلىسىم قازاقستانعا دا ءتيىمدى بولماق. ەگەر كەلىسىمگە قول قويىلسا، قازاقستان ازاماتى قىتايعا 30 كۇنگە ۆيزاسىز بارا الادى»، - دەدى ا. سمادياروۆ.