جەتىسۋ وبلىسىندا جول سالۋ كەزىندە ورەسكەل زاڭ بۇزۋشىلىق جاساعان مەملەكەتتىك قىزمەتشىلەر تەرگەلۋدە

استانا. قازاقپارات - جەتىسۋ وبلىسىنىڭ پروكۋراتۋراسى كەربۇلاق اۋدانىندا اۆتوموبيل جولىن سالۋ كەزىندە جىبەرىلگەن بۇزۋشىلىقتاردى انىقتادى، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.

7-ناۋرىزدا كەربۇلاق اۋدانىندا قار سۋىنىڭ شايۋى سالدارىنان مالايسارى ستانسياسىنا قاراي اۆتوموبيل جولى جارتىلاي بۇزىلىپ، جارامسىز بولىپ قالدى.

پروكۋرورلىق تەكسەرۋ ناتيجەسىندە وسى ۋچاسكەدە جوندەۋ جۇمىستارىن جۇرگىزۋ بارىسىندا زاڭنىڭ ورەسكەل بۇزۋشىلىقتارىنا جول بەرىلگەنى انىقتالدى.

باستاپقىدا بۇل جۇمىستار مەملەكەتتىك ورگانعا جوبالاۋ- سمەتالىق قۇجاتتاماسىز جانە ساراپتاما جۇرگىزبەستەن مەملەكەتتىك ساتىپ الۋدى جۇرگىزۋگە مۇمكىندىك بەرەتىن اعىمداعى جوندەۋ تۇرىندە زاڭسىز جۇرگىزىلگەن. بۇل ءوز كەزەگىندە تەحنيكالىق جانە اۆتورلىق قاداعالاۋ تاراپىنان باقىلاۋدى جويادى.

ناتيجەسىندە سۋ بۇرۋ جۇيەلەرىنىڭ وتكىزۋ قابىلەتى ەسەپتەلمەگەن جانە جۇرگىزىلگەن جۇمىستاردىڭ ساپاسى قامتاماسىز ەتىلمەگەن.

پروكۋراتۋرا مەملەكەتتىك ورگانداردىڭ لاۋازىمدى تۇلعالارىنىڭ ارەكەتتەرىندە مەملەكەتكە زيان كەلتىرگەن جانە اسا ءىرى زالال كەلتىرۋ تۇرىندەگى اۋىر زارداپتارعا اكەپ سوققان قىلمىستىق قۇقىق بۇزۋشىلىق بەلگىلەرىن انىقتادى.

وسى فاكت بويىنشا 3-ساۋىردە ارنايى پروكۋرورلار جۇزەگە اسىراتىن ق ر قىلمىستىق كودەكسىنىڭ 361-بابى 3-تارماعىنىڭ 4-بولىگى (لاۋازىمدىق وكىلەتتىكتەردى تەرىس پايدالانۋ) بويىنشا سوتقا دەيىنگى تەرگەپ- تەكسەرۋ باستالدى.