جەتىسۋدا انتيكور تۇلەكتەر كەشىنە اقشا جيناۋ فاكتىلەرى تۋرالى حابارلاۋدى سۇرادى

تالدىقورعان. قازاقپارات - سىبايلاس جەمقورلىققا قارسى ءىس-قيمىل اگەنتتىگى جەتىسۋ وبلىسى بويىنشا دەپارتامەنتىنىڭ وكىلدەرى مەكتەپتە اقشا جيناۋ فاكتىلەرى تۋرالى حابارلاۋدى سۇرادى، دەپ حابارلايدى قازاقپارات ءتىلشىسى.

«وقۋ جىلىنىڭ اياقتالۋىنا بايلانىستى، ءبىلىم بەرۋ مەكەمەلەرىندە تۇلەكتەر كەشىن ۇيىمداستىرۋ جوسپارلانادى. سونداي- اق مۇعالىمدەرگە سىيلىقتار الۋ ءۇشىن اقشا جيناۋ قاۋپى بار.

وسىعان وراي ازاماتتارعا مۇنداي ارەكەتتەرگە بارۋ زاڭمەن قاتاڭ تىيىم سالىنعانىن ايتا كەتۋ ماڭىزدى.

ق ر «سىبايلاس جەمقورلىققا قارسى» زاڭىنىڭ 22-بابى 1-1-تارماعىنا سايكەس مەملەكەتتىك ورگانداردىڭ، ۇيىمداردىڭ، كۆازيمەملەكەتتىك سەكتور سۋبەكتىلەرىنىڭ باسشىلارى باعىنىستى قىزمەتكەرلەردىڭ سىبايلاس جەمقورلىق قۇقىقبۇزۋشىلىقتار جاساۋىنىڭ الدىن الۋ جونىندەگى لاۋازىمدىق مىندەتتەرىن ورىنداماعانى نەمەسە تيىسىنشە ورىنداماعانى ءۇشىن جاۋاپقا تارتىلاتىنىن ەسكەرتەمىز»، - دەلىنگەن ۆەدومستۆو حابارلاماسىندا.

اتا-انالاردان نەمەسە قىزمەتكەرلەردەن اقشا جيناۋ فاكتىلەرى نەمەسە باسقا دا سىبايلاس جەمقورلىق كورىنىستەرى تۋرالى 1424 Call-ورتالىعىنا حابارلاۋعا بولادى.

«ازاماتتاردىڭ بارلىق وتىنىشتەرى مىندەتتى تۇردە قارالادى. بارلىق قاجەتتى شارالار قابىلداناتىن بولادى»، - دەلىنگەن ۆەدومستۆو مالىمەتىندە.