پرەزيدەنت ءىس باسقارماسىن سيفرلىق ترانسفورماتسيالاۋ بيۋروكراتيانى بارىنشا ازايتادى
«ىشكى بيزنەس پروتسەستەردى قايتا قاراپ، وڭتايلاندىرۋ پرەزيدەنتتىڭ مەملەكەتتىك سەكتوردى سيفرلىق قۇرالدار ارقىلى دامىتۋ جونىندەگى تاپسىرماسىنا وراي جۇرگىزىلىپ جاتىر. زاماناۋي تەحنولوگيالار باسقارۋ پروتسەسىن بارىنشا اۆتوماتتاندىرۋعا، قىزمەتكەرلەردىڭ جاۋاپكەرشىلىگى مەن كاسىپورىندار جۇمىسىنىڭ تيىمدىلىگىن ارتتىرۋعا ىقپال ەتەتىنىن ءتۇسىنۋىمىز كەرەك. سونىمەن قاتار بۇل جوبا ۇجىمداعى قارىم-قاتىناستى جاقسارتىپ، جۇمىس ناتيجەسىنە دە وڭ اسەر ەتەدى. جوباعا دايىندىق كەزەڭىندە الدىن الا ساراپتاما جاسالىپ، بەس جۇزگە جۋىق مامان اراسىندا ساۋالناما جۇرگىزىلدى، وزگەرىستەردىڭ باعىت-باعدارى ايقىندالدى»، - دەپ جازدى ايبەك دادەبايەۆ Telegram پاراقشاسىندا.
وسىلايشا سيفرلىق ترانسفورماتسيا مەديتسينالىق قىزمەت، قۇرىلىس، اۋە تاسىمالى مەن اۆتوتاسىمال، ۇيىمداستىرۋ جانە ماتەريالدىق-تەحنيكالىق قىزمەت كورسەتۋ سىندى باعىتتاردى قامتىپ وتىر.
سونداي-اق، قۇجات اينالىمى، HR- پروتسەسس، بيۋجەت قۇرۋ مەن قۇقىقتىق قولداۋ، ساتىپ الۋ، ستراتەگيالىق جوسپارلاۋ سياقتى باسقارۋ پروتسەستەرىن جەتىلدىرە ءتۇسۋ كوزدەلگەن.
«ترانسفورماتسيا ناتيجەسىندە ءوندىرىس پروتسەسىن ايتارلىقتاي وڭتايلاندىرۋدى، بيۋروكراتيانى بارىنشا ازايتۋدى جانە جۇمىس ساپاسىن ودان ءارى جاقسارتۋدى مەجەلەپ وتىرمىز»، - دەيدى پرەزيدەنت ءىس باسقارۋشىسى.
ونىڭ ايتۋىنشا، جوبا 2025-جىلى اياقتالادى. دەگەنمەن، وڭ وزگەرىستەر بيىلدىڭ وزىندە بولۋعا ءتيىس.
