وزبەكستان قۇراماسىنداعى قازاق جىگىتى مەدالعا ىلىكتى

استانا. قازاقپارات - تاشكەنت قالاسىندا ەرلەر اراسىندا ءوتىپ جاتقان بوكستان الەم چەمپيوناتىندا وزبەكستاندىق رۋسلان ابدۋللايەۆ جارتىلاي فينالعا شىقتى، دەپ حابارلايدى قازاقپارات ءتىلشىسى.

قازاق جىگىتى 63,5 كەلىگە دەيىنگى سالماقتا فرانسيالىق لۋنەس امراۋيمەن شەبەرلىك بايقاستى.

جەكپە-جەك قورىتىندىسىندا تورەشىلەردىڭ تورتەۋى جەڭىستى رۋسلان ابدۋللايەۆقا بەردى.

وسىلايشا، جارتىلاي فينالعا وتكەن رۋسلان ابدۋللايەۆ كەمىندە قولا مەدال الادى.

ول فينالعا شىعۋ ءۇشىن وليمپيادا مەن الەم چەمپيوناتىنىڭ قولا جۇلدەگەرى، ارمەنيالىق وگانەس باچكوۆپەن تالاسادى.

بۇدان ءۇش-ءتورت جىل بۇرىن رۋسلان ابدۋللايەۆ قازاقستانعا كەلىپ، ەل قۇراماسىنا ىلىگۋدى ماقسات ەتكەنىمەن، ول ويى ورىندالماي، وزبەكستانعا قايتىپ كەتكەن ەدى.

وسى چەمپيوناتتا وزبەكستاننان حاسانبوي دۋسماتوۆ (51 كەلى) پەن ابدۋماليك حالوكوۆ (57 كەلى) جارتىلاي فينالعا ءوتتى.

ەسكە سالا كەتەيىك، بۇدان بۇرىن قىتاي قۇراماسىنداعى قازاق بوكسشىسى الەم چەمپيوناتىندا قارسىلاسىن نوكاۋتپەن ۇتقانىن جازعان ەدىك.

قازاقستان قۇراماسىنان كاپيتان اسلانبەك شىمبەرگەنوۆ پەن دۋلات بەكباۋوۆ شيرەك فينالعا ءوتتى، ال نۇرقانات رايىس پەن سەرىك تەمىرجانوۆ شيرەك فينالعا شىعا المادى.