اتىراۋدا ءۇش ادامدى قاساقانا ءولتىرىپ، بىرەۋىن جارالاعان جىگىت ءومىر بويىنا سوتتالدى

اتىراۋ. قازاقپارات - اتىراۋدا ءۇش ادامدى قاساقانا ءولتىرىپ، بىرەۋىن جارالاعان جىگىت ءومىر بويىنا سوتتالدى، دەپ حابارلايدى قازاقپارات.

اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءۇش ادامدى قاساقانا ءولتىرىپ، ءبىر ادامدى قاساقانا ولتىرۋگە وقتالعان، اتىس قارۋلارىن يەمدەنىپ، تاسىمالداپ، قولدانعان ك- عا قاتىستى قىلمىستىق ءىس قارالدى.

سوتتالۋشى ق ر قىلمىستىق كودەكسىنىڭ 287-بابىنىڭ 3-بولىگىمەن، 24-بابىنىڭ 3-بولىگىمەن، 99-بابىنىڭ 2-بولىگىنىڭ 1,6-تارماقتارىمەن، 99-بابىنىڭ 2-بولىگىنىڭ 1,6-تارماقتارىمەن ايىپتالعان.

«ك. باسقا نەكەدەگى ايەلمەن كەزدەسە باستاعان. سالدارىنان ايەل ءۇش بالاسىمەن سوتتالۋشىعا كەتىپ، ولارعا اكەسىمەن ارالاسۋعا تىيىم سالعان. ۋاقىت وتە كەلە، ك. كوڭىلدەسىنىڭ ەكى جاس ءوسپىرىم بالاسىن ۇرعان. بۇل تۋرالى بالالارى اكەسىنە حابارلاپ، دەنە جاراقاتىن ءتۇسىرىپ العان بەينەجازبانى كورسەتكەن. اكەسى پوليتسياعا شاعىمدانعان. پوليتسيا ۋچاسكەسىندە تاراپتار اراسىندا كەلىسپەۋشىلىك تۋىنداپ، ولار بۇل ماسەلەنى كەشكە كەزدەسىپ شەشەتىن بولىپ كەلىسكەن»، - دەپ حابارلادى سوتتىڭ باسپا ءسوز قىزمەتى.

سول كۇنى كەشتە ك. وزىمەن بىرگە ەكى اتىس تاپانشاسىن الىپ، كەلىسكەن جەرگە كەلگەن.

بالالاردىڭ اكەسىنىڭ ءىنىسى ق. اتالعان جەرگە تۋىستارىمەن بىرگە 2 اۆتوكولىكپەن كەلگەن.

ا. (ق- نىڭ تۋىسى) كولىكتەن شىققان كەزدە ك. ونىڭ باسىنا وق اتقان. كەيىن اۆتوكولىكتە وتىرعان ن. جانە س- عا دا وق اتقان.

ق. ءوزىنىڭ ءومىرىن ساقتاۋ ماقساتىندا قاشا جونەلگەن. الايدا، ك. ونى قۋىپ جەتىپ، ەكىنشى تاپانشادان وعان بىرنەشە رەت وق اتقان.

قىلمىس جاساعاننان كەيىن ك. ەكى تاپانشانى جەرگە كومىپ تاستاپ، وقيعا ورنىنان قاشىپ كەتكەن. كەيىن جولدا ۇستالعان.

سوتتالۋشى ك- نىڭ قىلمىستىق ارەكەتىنەن جابىرلەنۋشىلەر ق، ن، س. وقيعا ورنىندا قازا بولعان.

ال، جابىرلەنۋشى ا. دەر كەزىندە كورسەتىلگەن مەديتسينالىق كومەكتىڭ ناتيجەسىندە اتىراۋ وبلىستىق اۋرۋحاناسىنىڭ جانساقتاۋ بولىمىندە ءتىرى قالعان.

سوتتالۋشى ك- نىڭ كىناسى جابىرلەنۋشىلەردىڭ، كۋالاردىڭ جاۋاپتارىمەن، مۇردەلەردى قاراۋ، تاپانشالاردى تابۋ حاتتاماسىمەن، ساراپتاما قورىتىندىلارىمەن، وقيعانىڭ تىكەلەي بەينەسى تۇسىرىلگەن بەينەجازبامەن دالەلدەنگەن.

سوت قاۋلىسىمەن تاعايىندالعان ساراپتاما قورىتىندىسىنا سايكەس، سوتتالۋشى ك. قىلمىس جاساعان ۋاقىتتا اففەكت جاعدايىندا بولماعان، پسيحيكالىق اۋىتقۋ انىقتالماعان.

پروكۋرور جانە جابىرلەنۋشىلەر سوتتالۋشى ك- نى بارلىق ايىپپەن كىنالى دەپ تانىپ، وعان ءومىر بويىنا باس بوستاندىعىنان ايىرۋ جازاسىن تاعايىنداۋدى سۇرادى.

قورعاۋ تاراپى سوتتالۋشىنىڭ ءىس-ارەكەتىن ق ك- ءتىڭ 101-بابىنىڭ 2-بولىگىنە (اففەكت جاعدايىندا ادام ءولتىرۋ) دارەجەلەپ، جەڭىل جازا تاعايىنداۋدى، ق ك- ءتىڭ 287-بابىمەن تاعىلعان ايىپتان اقتاۋدى ۇسىنعان.

ال، سوتتالۋشى ك. كىناسىن مويىنداماعان.

«اتالعان ءىس بويىنشا جازانى جەڭىلدەتەتىن جانە اۋىرلاتاتىن ءمان-جاي انىقتالمادى. سوت ۇكىمىمەن سوتتالۋشى ك. ق ك- ءتىڭ 287-بابىنىڭ 3-بولىگى، 24-بابىنىڭ 3-بولىگى، 99-بابىنىڭ 2-بولىگى 1,6-تارماقتارى، 99-بابىنىڭ 2-بولىگىنىڭ 1,6-تارماقتارىمەن كىنالى دەپ تانىلدى. سوتتالۋشىنىڭ جەكە باسىن، جاسالعان قىلمىستىڭ سيپاتى مەن دارەجەسىنىڭ قوعامعا قاۋىپتىلىگىن، ونىڭ قىلمىس جاساعانعا دەيىنگى جانە كەيىنگى مىنەز-قۇلقىن ەسكەرىپ، تۇزەلۋىنە جەتكىلىكتى قاجەتتى، ءادىل جازا تاعايىنداۋ جانە جاڭا قىلمىستاردىڭ الدىن الۋ قاعيدالارىن باسشىلىققا الىپ، تۇپكىلىكتى ءومىر بويىنا باس بوستاندىعىنان ايىرۋ جازاسىن تاعايىندادى. جابىرلەنۋشىلەردىڭ پايداسىنا 44 ميلليون تەڭگەدەن استام ماتەريالدى جانە مورالدى زالال ءوندىرىلدى» ، - دەپ ءمالىم ەتتى سوتتىڭ باسپا ءسوز قىزمەتىنەن.

سوت ۇكىمى زاڭدى كۇشىنە ەنگەن جوق.

ەسكە سالا كەتەلىك، بۇعان دەيىن اتىراۋدا ءۇش ادامدى اتىپ ءولتىرىپ، تاعى بىرەۋىن جاراقاتتاعان جىگىتتىڭ ءىسى سوتقا جەتكەنىن جازعان ەدىك.