پوليتسيا سەرىك كۇدەبايەۆتىڭ ەلدەن قاشۋىنا جاۋاپتى ەمەس - مارات قوجايەۆ

استانا. قازاقپارات - ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ الماتى وبلىسى بۇرىنعى پوليتسيا دەپارتامەنتىنىڭ باسشىسى سەرىك كۇدەبايەۆتىڭ ەلدەن قاشىپ كەتۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل جاعدايلاردى شاتاستىرماۋ كەرەك. گەنەرال سەرىك كۇدەبايەۆ قاماۋدا بولعان جوق جانە پوليتسيا بۇل جاعدايدا ونىڭ بۇلتارتپاۋ شاراسىنا جاۋاپ بەرمەيدى. وعان باسقا شارا تاعايىندالدى. مەن ءوز باياندامامدا قاماۋدان قاشۋدىڭ 11 فاكتىسى تۋرالى ايتتىم. شاتاسپاسام، جىل باسىنان بەرى باس بوستاندىعىنان ايىرۋ ورىندارىنان قاشۋ بويىنشا 3 فاكتى تىركەلدى. ونىڭ بارلىعى ءبىر تاۋلىك ىشىندە تابىلىپ، باس بوستاندىعىنان ايىرۋ ورىندارىنا قايتارىلدى. گەنەرال سەرىك كۇدەبايەۆ قاماۋدا بولعان جوق»، - دەدى مارات قوجايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ەسكە سالا كەتەيىك، بيىل 3- ساۋىردە تالدىقورعان قالالىق سوتى سەرىك كۇدەبايەۆقا حالىقارالىق ىزدەۋ جاريالاعان ەدى.

27- ساۋىردە سەرىك كۇدەبايەۆ تۇركيادا ۇستالىپ، ەلگە جەتكىزىلدى.

ايتا كەتسەك، الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان ەدى.

سوت ۇكىمىمەن سەرىك كۇدەبايەۆ 10 جىلعا سوتتالدى.