پوليتسەيلەردىڭ جۇمىسىنداعى باستى پروبلەمالار قانداي
«قازىر قوعامنىڭ پوليتسيادان كۇتەرى مول. سۇرانىس پەن تالاپقا ساي بولۋ - ءبىزدىڭ مىندەت. دەگەنمەن ءتيىستى جۇمىس جاعدايى جاسالماسا، ناتيجەگە قول جەتكىزۋ قيىن. وسى ورايدا پوليتسەيلەردىڭ قىزمەتىندە پروبلەما از ەمەس. اتاپ ايتقاندا، تۇراقسىز جۇمىس كەستەسى، دەمالىسسىز قىزمەت اتقارۋ، ارتىق ەسەپ، جۇمىستىڭ ناتيجەسى بەلگىلى ءبىر كورسەتكىشتەرمەن شەكتەلۋى، تومەن جالاقى، كولىك جانە تەحنيكانىڭ جەتىسپەۋى سەكىلدى پروبلەمالار بارشىلىق»، - دەدى مارات قوجايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، جوعارىدا اتالعان فاكتورلار ءتارتىپ ساقشىلارى ۇجىمىنىڭ مورالدىق جاعدايىنا كەرى اسەرىن تيگىزەدى.
«مۇنداي جاعدايدا سەرۆيستىك مودەل تۋرالى ايتۋ - اقىلعا سىيىمسىز. وزدەرىڭىز ويلاڭىزدارشى، ەسكى عيماراتتا، تومەن ايلىقپەن، كۇن-ءتۇن دەمەي، دەمالىسسىز قىزمەتتە جۇرگەن، شارشاپ-شالدىققان قىزمەتكەردەن «سىپايى بول، ىزالانبا، مەيىرىمدى بول» دەپ تالاپ ەتۋ وڭاي ەمەس. سوندىقتان، پوليتسيا قىزمەتى قوعام سۇرانىسىنا ساي بولۋى ءۇشىن ەڭبەك جاعدايىن جاقسارتۋ بويىنشا شۇعىل جانە جۇيەلى شارالار قابىلداۋ قاجەت»، - دەيدى ول.
