دەكرەتتەگى جانە جۇمىسسىز ايەلدەر «ۇماي» يپوتەكاسىنا نە ءۇشىن قاتىسا المايدى
يپوتەكانىڭ بۇل ءتۇرى جايلى نە ءبىلۋ كەرەك؟
«ۇماي» يپوتەكاسىنا 15,6 ميلليارد تەڭگە ءبولىندى. اتالمىش باعدارلاما بويىنشا، بۇل ءۇشىنشى ترانش. استانا، الماتى، اقتاۋ جانە اتىراۋ قالالارىنا زاەمنىڭ جالپى كولەمىنىڭ 40 پايىزىنان اسپايتىن بولىگىن نەمەسە 200 گە جۋىق نەسيە ءبولۋ جوسپارلانۋدا. نەسيەنىڭ 60 پايىزى وبلىستار مەن شاعىن قالالاردىڭ تۇرعىندارىنا بەرىلمەك.
«ۇماي» يپوتەكاسىنىڭ شارتتارى:
باستاپقى جارنا: ايلىق تابىسىڭىز 550000 تەڭگەدەن اسپاسا - 15 پايىز؛ ەگەر ءسىزدىڭ تابىسىڭىز 550000 تەڭگەدەن 640000 تەڭگەگە دەيىن بولسا، باستاپقى جارنا تۇرعىن ءۇي قۇنىنىڭ 20 پايىزىن قۇرايدى؛
باعدارلاما بويىنشا ساتىپ الىناتىن تۇرعىن ءۇيدىڭ ماكسيمالدى قۇنى 30 ميلليون تەڭگەگە تەڭ؛
نەسيە بويىنشا جىلدىق پايىزدىق مولشەرلەمە 14,4 پايىز (س ج ت م 15,4 پايىزدان باستاپ) جانە الداعى ۋاقىتتا 3,5 پايىز -5 پايىز - عا (س ج ت م 3,6 پايىزدان) دەيىن تومەندەيدى؛
نەسيە مەرزىمى 6 ايدان 25 جىلعا دەيىن؛
باسپانانى العاشقى جانە قايتالاما نارىقتان تاڭداۋعا بولادى؛
پاتەردى جوندەۋگە بەرىلەتىن نەسيە كولەمى - 3,7 ميلليون تەڭگەگە دەيىن.
«ۇماي» يپوتەكاسىنا كىمدەر قاتىسا الادى؟
ءوتىنىشتى ق ر- نىڭ 18 دەن 65 جاسقا دەيىنگى جۇمىسى بار جانە رەسمي كىرىسى بار بارلىق ايەلدەر قاتىسا الادى. ماڭىزدى فاكتور - ايەل جۇمىس جاساۋى كەرەك. دەكرەتتەگى جانە جۇمىسسىز ايەلدەر يپوتەكاعا قاتىسا المايدى.
«ۇماي» يپوتەكاسىنا قاتىسۋشىنىڭ كىرىسى قانشا بولۋى كەرەك؟
ايەلدىڭ نەمەسە كۇيەۋى ەكەۋىنىڭ (كۇيەۋى+ايەلى) ماكسيمالدى كىرىسى نالوگ شەگەرىلمەگەندە 640 مىڭ تەڭگەدەن اسپاۋى كەرەك. ناقتى سومانى ءبىلۋ ءۇشىن ودان زەينەتاقى جارناسى - 64 مىڭ تەڭگەنى، جەكە تابىس سالىعى - 52 مىڭ تەڭگەنى، م ءا م س جارناسى - 12 مىڭ تەڭگەنى الامىز. سول كەزدە 512 مىڭ شىعادى. ياعني، قولعا الاتىن تازا كىرىس وسى سومادان اسپاۋى كەرەك. بۇل تابىسىڭىز وسىنداي بولۋ كەرەك دەگەن ءسوز ەمەس، باسىتىسى وسىدان اسپاۋ كەرەك.
ال ەگەر جالاقىڭىز جەتپەسە، ەكى ادامعا دەيىن قوسالقى قارىز الۋشى (سوزاەمشيك) تارتا الاسىز.
بۇل باعدارلامادا كىرىستىڭ مينيمالدى سوماسى جوق. كەز كەلگەن يپوتەكاداعى سەكىلدى بۇل باعدارلامادا دا بانك كىرىستى ەسەپكە الا وتىرىپ، تولەم قابىلەتتىلىكتى باعالايدى: وتباسى قۇرامى، بالالار سانى، تاماقتانۋ شىعىنى، كوممۋنالدى تولەمدەر، باسقا كرەديتتەر جانە ت. ب نارسەلەر ەسكەرىلەدى.
كىمدەر قوسالقى قارىز الۋشى بولا الادى؟
18-65 جاس ارالىعىنداعى ق ر تۇرعىندارى كەپىلگەر بولا الادى. ونىڭ سوڭعى 6-12 ايداعى كىرىسى ەسەپكە الىنادى. بانك كەپىلگەرگە كانديداتۋرانى ماقۇلداۋى كەرەك. ول تۋىسىڭىز، دوستارىڭىز نەمەسە تانىستارىڭىز بولۋى مۇمكىن.
«ۇماي» يپوتەكاسىنا قاتىسۋ ءۇشىن «وتباسى بانكىندە» دەپوزيت بولۋى كەرەك پا؟
بۇل يپوتەكاعا قاتىساردا «وتباسى بانكىنىڭ» دەپوزيتى بولۋى مىندەتتى ەمەس، ءبىراق ونى كرەديتتى راسىمدەۋ كەزىندە اشۋ كەرەك بولادى.
«ۇماي» يپوتەكاسىنا ءوتىنىم قابىلداۋ قاشانعا دەيىن سوزىلادى؟
ونىڭ اياقتالۋىنىڭ ناقتى مەرزىمى جوق. مىسالى، 2021-جىلى 8,4 ميلليارد تەڭگە كولەمىندەگى ءبىرىنشى ترانش يگەرىلىپ، 954 نەسيە بەرىلگەن بولاتىن. 2022 -جىلى 14 ميلليارد تەڭگە كولەمىندە ەكىنشى ترانش قابىلدانىپ، 1120 نەسيە راسىمدەلدى. ال بيىل 15,6 ميلليارد تەڭگە ءبولىندى. يپوتەكاعا ءوتىنىش قابىلداۋ وسى سوما يگەرىلگەنگە دەيىن سوزىلادى.
ءوتىنىش بەرۋ ءۇشىن بانك بولىمشەلەرىنە نەمەسە بانكتىڭ كەڭەس بەرۋ ورتالىقتارىنا بارۋعا بولادى. سونداي-اق otbasybank.kz پورتالىندا ونلاين تىركەلۋگە بولادى.
