پەتروپاۆلدا توتەنشە جاعداي جاريالانعاننان كەيىن زارداپ شەككەندەرگە وتەماقى بەرىلمەك
پەتروپاۆل قالالىق اكىمدىگى 7- مامىر كۇنى «بەرەكە» شاعىن اۋدانىندا بولعان ورتكە قاتىستى قازىر قانداي جۇمىس ىستەلىپ جاتقانىن ايتتى.
بۇگىندە تەرگەۋ جۇرۋدە، ازىرگە ءورتتىڭ شىعۋ سەبەبى انىقتالعان جوق.
قالا اكىمىنىڭ باسپا ءسوز حاتشىسى ەلميرا ءسادۋاقاسوۆانىڭ ايتۋىنشا، 7- مامىر كۇنى توتەنشە جاعداي بويىنشا كوميسسيا قۇرىلىپ، ولار ءتيىستى جۇمىستى اتقارىپ جاتىر.
«8- مامىر كۇنى ولار ءورت بولعان جەردى تەكسەرىپ شىقتى، ناتيجەسىندە 9 ءۇيدىڭ تولىق جانىپ كەتكەنىن جانە تاعى ەكى باسپانانىڭ ءىشىنارا زاقىمدانعانىن انىقتادى. سول كۇنى كوميسسيا زارداپ شەككەندەرگە ۋاقىتشا تۇراتىن ءۇي بەرۋ ماسەلەسىن قارادى، قازىرگى ۋاقىتتا 7 وتباسى جالعا بەرىلەتىن پاتەرلەرگە دەمەۋشىلەردىڭ اقشاسىنا ورنالاستىرىلدى. ولار كۇندەلىكتى تۇرمىسقا قاجەت بارلىق كەرەك-جاراقپەن: ازىق-تۇلىكپەن، ءدارى-دارمەكپەن، جەكە گيگيەنالىق قۇرالدارمەن قامتىلدى.
قازىر تاعى 4 وتباسى ءبىز ۇسىنعان شەشىممەن كەلىسپەي جاتىر، سول سەبەپتى باسقا نۇسقالارىن قاراپ جاتىرمىز. پاتەرلەردى ولاردىڭ بالالارى باراتىن مەكتەپتەردىڭ جانىنان ىزدەيمىز. وتباسىنىڭ قۇرامى دا ەسەپكە الىنادى. ولار ازىرگە تۋعان- تۋىستارىندا تۇرىپ جاتىر»، - دەيدى ەلميرا ءسادۋاقاسوۆا.
ماماننىڭ ايتۋىنشا، جالعا بەرىلەتىن پاتەرلەر وبلىس ورتالىعىنداعى ورتاشا باعا بويىنشا الىندى. ال 4 وتباسى قونىستانعىسى كەلگەن پاتەرلەر نارىقتاعى باعادان جوعارى.
«8- مامىر كۇنى «اشىق» نورماتيۆتىك-قۇقىقتىق اكتىلەردىڭ پورتالىندا تەحنوگەندىك سيپاتتاعى توتەنشە جاعداي رەجيمىن ەنگىزۋ جونىندە قاۋلىنىڭ جوباسى جاريالاندى. قازىرگى ۋاقىتتا ونلاين تۇردە تالقىلاۋ ءجۇرىپ جاتىر.
توتەنشە جاعداي رەجيمى بىزگە زارداپ شەككەندەرگە زاڭ اياسىندا كومەك كورسەتۋ ءۇشىن قاجەت. ماسەلەن، وسىدان كەيىن ءۇي يەلەرىنە 100 ا ە ك مولشەرىندە جاردەماقى بەرىلەدى.
توتەنشە جاعداي رەجيمى جاريالانعاننان كەيىن تاۋەلسىز ساراپشىلار كەلگەن ماتەريالدىق شىعىن مولشەرىن ەسەپتەيدى. وسىدان كەيىن زارداپ شەككەندەرگە وتەماقى بەرىلەدى. ول اقشاعا باسپانا الۋلارىنا بولادى. بۇگىن قۇجاتتارى جانىپ كەتكەن وتباسىلار جاڭادان جەكە كۋالىكتەرىن ىستەتىپ جاتىر»، - دەيدى قالا اكىمىنىڭ باسپا ءسوز حاتشىسى.
15 جىلعا شاقتالعان پەتروپاۆلدىڭ باس جوباسى بويىنشا بۇگىندە كۇلگە اينالعان ۇيلەر ءسۇرىلۋى ءتيىس بولاتىن.
