15:41, 10 - مامىر 2023 | GMT +5
ماڭعىستاۋ وبلىسىنىڭ شەكاراسىن كەڭەيتۋ جوسپارلانىپ وتىر
استانا. قازاقپارات - ماڭعىستاۋ وبلىسىنىڭ شەكاراسى وزگەرۋى مۇمكىن. بۇل تۋرالى «اشىق» ن ق ا پورتالىندا جاريالانعان ۇكىمەت قاۋلىسىنىڭ جوباسىندا جازىلعان، دەپ حابارلايدى قازاقپارات ءتىلشىسى.
«ماڭعىستاۋ وبلىسىنىڭ شەكاراسى مەن كاسپي تەڭىزى اكۆاتورياسىنىڭ باستاپقى سىزىعى اراسىنداعى جالپى الاڭى 721940,2365 گەكتار جەردى وبلىس اۋماعىنا قوسۋ ارقىلى ماڭعىستاۋ وبلىسىنىڭ شەكاراسى وزگەرتىلسىن»، - دەلىنگەن ۇكىمەت قاۋلىسىنىڭ جوباسىندا.
قۇجاتقا قوسىمشا بەرىلگەن تۇسىندىرمەگە ساي، جەردى وبلىس قۇرامىنا قوسۋ ءۇشىن قوسىمشا قاراجات تالاپ ەتىلمەيدى جانە ونىڭ تەرىس الەۋمەتتىك-ەكونوميكالىق سالدارى بولمايدى.
«جوبانى قابىلداۋ ماڭعىستاۋ وبلىسىنىڭ شەكاراسى مەن كاسپي تەڭىزى اكۆاتورياسىنىڭ باستاپقى سىزىعى اراسىنداعى جەردى وبلىس اۋماعىنا قوسۋ ارقىلى ماڭعىستاۋ وبلىسىنىڭ شەكاراسىن وزگەرتۋگە مۇمكىندىك بەرەدى»، - دەپ تۇسىندىرمە بەرىلگەن قاۋلىعا.
قۇجات 24- مامىرعا دەيىن كوپشىلىك تالقىلاۋدا بولادى.
