مەملەكەتتىك ساتىپ الۋعا وزگەرىستەر ەنگىزۋ ماسەلەسى قاراستىرىلىپ جاتىر - باۋىرجان سماعۇلوۆ

استانا. قازاقپارات - مەملەكەتتىك ساتىپ الۋعا وزگەرىستەر ەنگىزۋ ماسەلەسى قاراستىرىلىپ جاتىر. بۇل تۋرالى ءماجىلىس دەپۋتاتى باۋىرجان سماعۇلوۆ ايتتى، دەپ حابارلايدى قازاقپارات ءتىلشىسى.

«Amanat پارتياسى تاريفتەردىڭ اشىقتىعى ءۇشىن كۇرەسەدى. ءبىز ەنەرگيا وندىرەتىن ستانسالاردا تاريفتىڭ قالاي قالىپتاساتىندىعىن، ول سۋبەكتىلەرگە دەيىن نە حالىققا دەيىن قالاي تاسىمالداناتىندىعىن قارايتىن بولامىز»، - دەدى باۋىرجان سماعۇلوۆ Jibek Joly تەلەارناسىنىڭ ماجىلىستەگى موبيلدى ستۋدياسىندا.

ونىڭ اتاپ وتۋىنشە، مەملەكەت پەن مەنشىك يەسى سالعان سۋبسيديا مەن ينۆەستيتسيا شەشىم قابىلداۋ بارىسىندا ەسكەرىلۋى ءتيىس.

«بارلىعى دا ەسكەرىلىپ، باقىلانۋى ءتيىس. بۇل ەنەرگەتيكا مينيسترلىگىنە قاراستى اتوم جانە ەنەرگەتيكالىق قاداعالاۋ جانە باقىلاۋ كوميتەتىنىڭ قۇزىرەتىنە كىرەدى. الداعى جىلۋ ماۋسىمىنا دايىندىق وسى ماۋسىم اياقتالعاننان كەيىن بىردەن باستالۋى ءتيىس. سوندىقتان ءۇزىلىس دەگەن بولمايدى. دايىندىقتى نەعۇرلىم ەرتە باستاسا، سوعۇرلىم جاقسى. سىني ساتتەر بولعان كەزدە ولاردى قالاي تەزىرەك جانە قانداي مەرزىمدە جويۋعا بولاتىندىعىن الدىن الا ويلاستىرعان ءجون. ەڭ ماڭىزدى دۇنيەگە نازار اۋدارۋ قاجەت. ول - جىلۋ جەلىلەرى. ەگەر ستانسا جىلۋ مەن ەلەكتر ەنەرگياسىن جاقسى ءوندىرىپ تۇرعانىمەن جىلۋ جەلىلەرى دايىن بولۋى ءتيىس»، - دەدى ول.

باۋىرجان سماعۇلوۆ بارلىق كونكۋرستىق ءراسىمدى ول ۇزاققا سوزىلىپ كەتپەۋى ءۇشىن الدىن الا قاراستىرۋ قاجەتتىگىن باسا ايتتى.

«مەملەكەتتىك ساتىپ الۋعا وزگەرىستەر ەنگىزىلەتىن بولادى. بۇل ماسەلە قازىرگى ۋاقىتتا قاراۋ ساتىسىندا تۇر»، - دەدى ءماجىلىس دەپۋتاتى.