پەتروپاۆلداعى ەلدى بولشەكتەۋشىلەر ءىسى: كۇدىكتىلەردىڭ باسقا وڭىرلەردەگى جاقتاستارىن انىقتاۋ جۇمىسى
«2023 -جىلعى 30-ناۋرىزدا سولتۇستىك قازاقستان وبلىسىنىڭ ءبىرقاتار تۇرعىنىنىڭ الەۋمەتتىك جەلىلەردە «حالىق كەڭەسىن» قۇرۋ باستاماسىن جاريالاۋ فاكتىسىنە قاتىستى ۇلتتىق قاۋىپسىزدىك كوميتەتى قازاقستان رەسپۋبليكاسى قىلمىستىق كودەكسىنىڭ 180-بابى، 2-تارماعى بويىنشا (بۇقارالىق اقپارات قۇرالدارىمەن نەمەسە تەلەكوممۋنيكاتسيالىق جەلىلەردى پايدالانا وتىرىپ جاساعان سەپاراتيستىك ارەكەت) پەتروپاۆل قالاسىنىڭ بىرنەشە تۇرعىنىنا قاتىستى تەرگەۋ ءىس- شارالارىن جۇرگىزۋدە. كوميسسيالىق پسيحولوگيا ساراپتاماسىنىڭ قورىتىندىلارىنا سايكەس قاتىسۋشىلاردىڭ ءىس- ارەكەتتەرىندە سەپاراتيزم بەلگىلەرى انىقتالىپ، قاماۋعا الىندى. قازىرگى تاڭدا باسقا وڭىرلەردە ولاردىڭ جاقتاستارىن انىقتاۋ بويىنشا جۇمىستار جۇرگىزىلۋدە»، - دەپ اتاپ وتەدى ۆيتسە- پرەمەر جاۋابىندا.
ونىڭ اتاپ وتۋىنشە، وسىنداي كەلەڭسىز جاعدايلار بويىنشا ورتالىق جانە جەرگىلىكتى اتقارۋشى ورگاندار تاراپىنان زاڭ تالاپتارىن بۇزۋشىلارعا قاتىستى قاتاڭ دەن قويۋ ءىس- شارالارى مەن الگوريتمدەر پىسىقتالعان. قوعامدىق- ساياسي جانە الەۋمەتتىك- ەكونوميكالىق سالالارداعى داعدارىستىق جاعدايلار تۋىنداعان كەزدە مەملەكەتتىك ورگانداردىڭ جەدەل حابارلاندىرۋ جانە اقپاراتتىق ارەكەت ەتۋ الگوريتمى جۇمىس ىستەيدى.
«بۇدان باسقا، وڭىرلىك ادىلەت ورگاندارى حالىقتىڭ قۇقىقتىق ساۋاتتىلىعىن جەتىلدىرۋ ءۇشىن قۇقىقتىق مادەنيەت پەن قۇقىقتىق نورمالارى بويىنشا ءتۇسىندىرۋ جۇمىستارىن بەلسەندى جۇزەگە اسىرۋدا. وسى رەتتە، قۇقىقتىق ناسيحات بويىنشا بۇقارالىق اقپارات قۇرالدارىن، ينتەرنەت- پورتالداردى، الەۋمەتتىك جەلىلەردى قامتيتىن ءبىرقاتار ءىس- شارا (تىكەلەي ەفيرلەر، كىرىسپەلەر، سۇحباتتار) وتكىزىلۋدە. ۇكىمەت ازاماتتاردىڭ، اسىرەسە جاستاردىڭ اراسىندا پاتريوتيزم، مەملەكەتتىك مۇددە قۇندىلىقتارىن ناسيحاتتاۋ، اقپاراتتىق ءتۇسىندىرۋدى ارتتىرۋ بويىنشا كەشەندى جۇمىستار جۇرگىزۋدە»، - دەپ اتاپ وتەدى التاي كولگىنوۆ.
بۇعان دەيىن سەپاراتيزم بابىمەن تەرگەلىپ جاتقان پەتروپاۆل قالاسىنىڭ ءۇش تۇرعىنىنىڭ مالىمدەمەسىندە «قازاقستاننىڭ اۋماقتىق تۇتاستىعىن بۇزۋدى ناسيحاتتاۋ» بەلگىلەرى بار ەكەنى انىقتالعانىن جازعان ەدىك.
