ءاربىر بالاعا شارتسىز جاردەماقى ەنگىزۋ الەۋمەتتىك تاۋەلدىلىككە الىپ كەلەدى - التاي كولگىنوۆ
بۇل جايىندا ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى التاي كولگىنوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«الەۋمەتتىك كودەكس اياسىندا حالىقتىڭ ورتاشا تابىسى نەگىزىندە كەدەيلىك شەگىنىڭ مولشەرىن ەسەپتەۋ ۇسىنىلادى. ول الەۋمەتتىك كومەكتىڭ مولشەرىنە اسەر ەتەدى. قازاقستاندا مۇنداي ادىستەمەنى ەنگىزۋ 2025 -جىلدان باستاپ جوسپارلانۋدا. بۇل ءىس-شارا از قامتىلعان حالىققا الەۋمەتتىك كومەك مولشەرىنە وڭ اسەر ەتەدى دەپ سانايمىز»، - دەپ اتاپ وتەدى ۆيتسە-پرەمەر جاۋابىندا.
سونىمەن قاتار ۇكىمەت باسشىسىنىڭ ورىنباسارى 2019 -جىلعى اتاۋلى الەۋمەتتىك تولەمدى ءاربىر بالاعا بەلگىلەنگەن تولەم ەنگىزۋ تۇرىندە كورسەتۋ تاجىريبەسى تەرىس اسەر ەتكەنىنە نازار اۋدارتادى.
«اتاپ ايتقاندا، جالعان اجىراسۋلاردىڭ وسۋىنە، اليمەنت مولشەرىنىڭ تومەندەۋىنە، اتا-انا مىندەتتەمەلەرىن ورىنداۋدان جالتارۋعا، جۇمىسقا ورنالاسۋدان باس تارتۋعا، از قامتىلعان جانە تۇرمىسى ناشار وتباسىلاردىڭ وسۋىنە جانە تاعى باسقالارىنا ىقپال ەتتى. وسىعان بايلانىستى، ءاربىر بالاعا شارتسىز بالالار جاردەماقىسىن ەنگىزۋ ەداۋىر بيۋدجەت شىعىندارىنا جانە دە الەۋمەتتىك تاۋەلدىلىككە الىپ كەلەدى. بۇل مەملەكەت باسشىسىنىڭ شىنىمەن مۇقتاج ازاماتتارعا الەۋمەتتىك قولداۋ كورسەتۋ جانە ءوز وتباسى ءۇشىن جاۋاپكەرشىلىگىن ارتتىرۋ بولىگىندەگى تاپسىرماسىنا قايشى كەلەدى»، - دەدى التاي كولگىنوۆ.
