بەس ءتىلدى بىلەتىن قازاقستانداعى ەڭ جاس دوكتورانت قازاق تىلىن ۇيرەنە الماعان
23 جاستاعى ازات التىنبەكوۆ بىرنەشە ءتىلدى بىلگەنىمەن، ءوزىنىڭ انا ءتىلى - قازاق ءتىلىن ۇيرەنۋ وڭايعا سوقپاي تۇرعانىن مويىنداپ وتىر، دەپ حابارلايدى KAZ. NUR. KZ «يندۋستريالنايا كاراگاندا» باسىلىمىنا سىلتەمە جاساپ.
باسىلىمنىڭ جازۋىنشا، ازات بۇگىندە ە. ا. بۋكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ دوكتورانتۋراسىندا وقىپ جاتىر جانە تىلدەردى مەڭگەرگەندى ۇناتادى. ول قازىر ورىس، اعىلشىن تىلىنەن بولەك، نەمىس، فرانسۋز، يتاليان تىلدەرىن بىلەدى. جاقىندا كارىس ءتىلىن وقۋعا دەن قويعان.
باسىلىم حابارلاۋىنشا، كەز كەلگەن ءتىلدى ۇيرەنۋدە ازاتتىڭ ءوزىنىڭ ءادىسى بار. سولاردىڭ ءبىرى - پسيحولوگيا.
«ورتا سىنىپتا سىنىپتاستارىمنىڭ الدىندا اعىلشىن ءتىلىن جاقسى بىلەتىندەي كەيىپ تانىتاتىنمىن. نەمىس ءتىلىن وقىپ جۇرگەندە دە سول تاجىريبەنى قولدانۋدى ۇيعاردىم - قىزداردى ءتىلدى جاقسى بىلەتىنىمە سەندىردىم، ولار سەنىپ، مەنەن كومەك سۇراي باستادى. سوندىقتان ابىرويىمدى جوعالتىپ الماۋ ءۇشىن ءارى ساۋاتىمدى ارتتىرۋ ماقساتىندا ءتىلدى تەرەڭىرەك بىلۋگە تۋرا كەلەتىن. بۇل دا ۇلكەن موتيۆاتسيا بولدى. كەيىن باسقا دا تىلدەردى ۇيرەنگەندە سولاي بولدى. دەگەنمەن، ۇنەمى پراكتيكا دا كەرەك»، - دەيدى ازات.
لينگۆيستىڭ ايتۋىنشا، ول تەلەفونىن تولىق يتاليان تىلىنە اۋىستىرعان. سونىمەن قاتار ول Instagram جەلىسىن دە جاڭالىقتار مەن جازبالار تەك يتاليان تىلىندە شىعاتىنداي ەتىپ قويعان.
ازات جاڭا سوزدەردى قۇر جاتتاپ، ەستە ساقتاۋ ادىسىنە قارسى، ايتۋىنشا، سەبەبى جاڭا جاتتالعان سوزدەر وڭاي ۇمىتىلادى. ونىڭ ورنىنا بەيتانىس ءسوزدى كەزدەستىرگەن جاعدايدا سوزبە- ءسوز اۋدارماسىن ىزدەمەس بۇرىن، جالپى كونتەكستەن ءسوزدىڭ ماعىناسىن تۇسىنۋگە تىرىسۋ كەرەك. وسىدان كەيىن عانا ءسوزدىڭ ماعىناسىن سوزدىكتەن قاراۋعا بولادى. سول كەزدە عانا جاڭا ءسوز ادامنىڭ جادىندا قالادى.
«ءبىر قىزىعى، قازىر مەن ءۇشىن ەڭ قيىنى قازاق ءتىلى بولىپ وتىر... دوكتورانتۋراعا ەمتيحان تاپسىرۋ ءۇشىن مەملەكەتتىك ءتىلدى ءبىلۋ كەرەك بولعاندىقتان، ونى تەرەڭ مەڭگەرۋدى ءجون كوردىم. ءبىراق ەشبىر ءادىس كومەكتەسپەدى. گرامماتيكانى ۇيرەنۋگە تىرىسىپ ەدىم، ءبىراق ول تەك كەدەرگى بولدى. ۇنەمى تىڭدايتىن زاماناۋي قازاق اندەرىنىڭ پلەيليستىن جاسادىم، ءبىراق بۇل دا ازىرگە كومەكتەسپەي تۇر. مەن ءبارىن تۇسىنەمىن، ءبىراق ءالى سويلەي المايمىن»، - دەيدى ازات.
كوپ ءتىلدى بىلەتىن ازات شەتەل اسىپ، ءبىلىمىن جەتىلدىرۋگە اسىقپايدى. ول ءوز وتانىندا قالىپ، ءتىل ۇيرەنۋگە دەگەن سۇيىسپەنشىلىكتى دامىتۋعا نيەتتى.
