ستۋدەنت ءدىني ءان تاراتقانى ءۇشىن ءۇش جىلعا سوتتالدى

استانا. قازاقپارات - وزبەكستاندا جاحونگير ۋلۋگمۋرودوۆ ەسىمدى ستۋدەنت «فاناتيزم يدەياسىن سىڭگەن» ءدىني ءاندى تاراتقانى ءۇشىن ءۇش جىلعا سوتتالدى.

سوتتالۋشى تۋىستارىنىڭ ايتۋىنشا، ول سىنىپتاستارىنا YouTube-تاعى ناشيدتىڭ (مۇسىلماندىق ءان) سىلتەمەسىن جىبەرگەن، - دەپ حابارلايدى Massaget.kz ءتىلشىسى Gazeta.uz-كە سىلتەمە جاساپ.

وزبەكستان جوعارعى سوتىنىڭ باسپا ءسوز قىزمەتى وكىلدەرىنىڭ مالىمەتىنشە، تاشكەنت وبلىسى اققورعان اۋدانىنىڭ قىلمىستىق ىستەر جونىندەگى سوتى 8-مامىردا 21 جاستاعى ستۋدەنت جاحونگير ۋلۋگمۋرودوۆتى ءدىني ءان تاراتقانى ءۇشىن ءۇش جىلعا باس بوستاندىعىنان ايىردى.

سۋديا سانجار يساقۇلوۆ ونى قىلمىستىق كودەكستىڭ 244-1-بابى 3-بولىگى «گ» تارماعى بويىنشا كىنالى دەپ تانىدى. ول 5 جىلدان 8 جىلعا دەيىن باس بوستاندىعىنان ايىرۋدى قاراستىراتىن جازانىڭ جەڭىلدەتىلۋىنە بايلانىستى ءۇش جىلعا باس بوستاندىعىنان ايىرىلدى.

Kun.uz باسىلىمىنىڭ مالىمەتىنشە، تۋىستارى ونىڭ تاشكەنت مەملەكەتتىك ەكونوميكالىق ۋنيۆەرسيتەتىندە گرانتتا وقيتىنىن جانە وتباسىنىڭ اسىراۋشىسى ەكەنىن ايتقان.

جاحونگير ۋلۋگمۋرودوۆتى يانگيۋل اۋدانىنداعى ۇيىنەن پروفيلاكتيكالىق ينسپەكتور الىپ كەتكەن. كەيىن ونىڭ تەلەفونىنان 2022 -جىلى Telegram-داعى سىنىپتاستارى بار توپتا YouTube-تەگى ناشيدتىڭ (مۇسىلماندىق ءان) سىلتەمەسى تابىلعان. ءدىن ىستەرى كوميتەتىنىڭ قورىتىندىسى بويىنشا، ءدىني ءان «فاناتيزم يدەيالارىنا تولى».

جوعارعى سوتتىڭ باسپا ءسوز قىزمەتى وكىلدەرى ستۋدەنتتىڭ «ءالحامدۋليللاھ» Telegram-توبىنا (توپتا 10 ادام بار) «شاحيد بۋليب كەتساك روزي بۋلينگيز» («ءشاھيد بولساق، رازى بولىڭىز») اتتى «جيھاد» پەن «حيجريگە» شاقىرعان ناشيدتىڭ سىلتەمەسى تابىلعان. وسى سەبەپتى جىگىتتەن ايعاق رەتىندە iPhone X تاركىلەنىپ الىندى.