جەتىسۋ وبلىسىندا باۋىرجان مومىش ۇلىمەن قاتار مايدانعا كىرگەن ارداگەر تۇرادى
تەلەارنا مالىمەتىنشە، قارت مايدانگەر ەكىنشى دۇنيەجۇزىلىك سوعىستا داڭقتى پولكوۆنيك باسقارعان 9-شى گۆارديالىق ديۆيزيا ساپىندا بولعان. ءارى سول كەزدىڭ اسا قۇپيا قارۋىن كۇزەتىپ، ونى جاۋ قولىنا بەرمەۋ مىندەتىن اتقاردى.
سارسەنباي قاڭتارباي قازىر كەنجە نەمەرەسىنىڭ كۇتىمىندە. قارت مايدانگەردى مەرەكەلىك شارالارعا اپارىپ، الىپ كەلەتىن دە نۇرالى. جيىرماعا قادام باسقان جاس جىگىت اتاسىن ۇلگى تۇتار اسقار تاۋىم دەپ بىلەدى.
«اتام تاريحتا قالاتىن تۇلعا دەپ ەسەپتەيمىن. اشتىقتى دا كوردى. سوعىستى دا كوردى. قانداي قيىندىق بولسا دا مويىماي توتەپ بەرىپ، قالاي ءومىر ءسۇرۋ كەرەك ەكەنىن قيىندىققا قالاي شىداي كەرەك ەكەنىن ىسپەن دالەلدەپ كەلە جاتىر. جانە دە ومىردەن كورگەن تۇيگەنىن بىزگە ايتىپ وتىرادى. مەن اتاممەن ماقتانام»، - دەيدى سوعىس ارداگەرىنىڭ نەمەرەسى نۇرالى سارسەنباي.
سارسەنباي ارداگەر 1942 -جىلى اسكەرگە شاقىرتىلىپ اياگوزدە جاساقتالعان تۇڭعىش قازاق پولكىنىڭ قۇرامىنا الىنعان. اۆتوماتشىلاردى دايىندايتىن التى ايلىق وقۋ- جاتتىعۋدان سوڭ سوعىستىڭ ناعىز قايناعان ورتاسىنا تۇسەدى.
ءبىر جىلدان سوڭ سانى سيرەگەن ساربازدار باۋىرجان مومىش ۇلى باسقارعان 9-گۆارديالىق ديۆيزياعا قوسىلىپتى. ولارعا سول كەزدىڭ ەڭ ءقاۋىپتى ءارى قۇپيا قارۋىن كۇزەتۋ مىندەتى جۇكتەلگەن.
«پريسياگا بەرگەنبىز. ول»كاتيۋشا«ايتىلمايدى. قۇپيا ءبولىم عوي. №49-كاتيۋشانى كۇزەتتىك، ءبىر جەردە 15 مينۋت تۇرادى. ودان ارتىق تۇرمايدى. كۇندىز توعايدىڭ ىشىنە كەتىپ قالادى. قاي جەردە نەمىستىڭ قاۋىرت جينالعانى بار سونى اتادى. باۋىرجان مومىش ۇلى قاتال ادام عوي. بۇيرىق بەرەدى. سويلەيدى، جىگەرلەندىرەدى سولداتتاردى، قايتپاڭدار ارتىڭدا وتانىڭ، اكە- شەشەڭ، ەلىڭ- جۇرتىڭ ەشقانداي قاشىپ پلەنگە ءوتىپ كەتۋ بولعان جوق»، - دەيدى سوعىس ارداگەرى سارسەنباي قاڭتارباي.
9-گۆارديالىق اتقىشتار ديۆيزيا ساپىندا سارسەنباي اقساقال پولشا، ليتۆا، لاتۆيا، ەستونيا سىندى ەلدەردى ازات ەتۋگە قاتىسىپتى. ءومىرىنىڭ ءۇش جىلىن مايدان دالاسىندا وتكىزگەن ول گەرمانياعا دەيىن جەتەدى. سول مەملەكەت اۋماعىنداعى شايقاس كەزىندە باۋىرجان مومىش ۇلىمەن قاتار جارالانعان.
«باۋىرجان مومىش ۇلى ەكەۋىمىز 21-قاڭتار 1945 -جىلى جارالاندىق. ول كىسى بەلىنەن جارالاندى. ءبىز 12 اۆتوماتشى جارالاندىق. ۇشاققا سالىپ ماسكەۋگە جىبەردى، ۆلاديمير وبلىسى كالچيۋگين قالاسىندا 6 اي جاتىپ ەمدەلدىك. ءبىر ايدان سوڭ جەڭىس كەلدى. سول جەردە ماسكەۋگە بارىپ پارادقا بارىپ كوردىك ءبارىن. سوعىستان كەيىن دە بىرگە بولىپ دامدەس تۇزداس بولىپ تۇردىق. بىلايشا جاقىن جۇرگەندە باۋىرماشىل ادام بولعان»، - دەيدى سوعىس ارداگەرى.
قارت مايدانگەر ەلگە كەلگەن سوڭ مۇعالىم جانە پوشتاشى بولىپ ەڭبەك ەتكەن. سودان بولار ءالى كۇنگە دەيىن باسپا ءسوزدى شولىپ، راديونى تىڭداپ، تەلەارنادان جاڭالىقتاردى كورۋگە تىرىسادى. جۇزگە جۋىق نەمەرە شوبەرە ءسۇيىپ، عاسىرلىق عۇمىر كەشكەن قاريا ەلدەگى بەيبىتشىلىكتىڭ بۇزىلماۋىن ۇنەمى اق باتاسىنا ارقاۋ ەتىپ كەلەدى.
