قونايەۆتى ءۇي سىپىرۋشىعا تەڭەگەن حوحلوۆ قالاي جازالاندى
«مەن ول كەزدە الماتى قالالىق اتقارۋ كوميتەتىنىڭ ءتوراعاسى - زامانبەك نۇرقادىلوۆتىڭ كەڭەسشىسى بولىپ قىزمەت ىستەيتىنمىن. زاكەڭ مەنى شاقىرتىپ الىپ:
- كەشە تۇندە دىنمۇحاممەد قونايەۆ اعامىزدىڭ اۋلاسىنداعى جەكە «ۆولگا» اۆتوكولىگىنىڭ راديوسى مەن ماگنيتوفونىن بىرەۋلەر ۇرلاپ اكەتىپتى. ۇرىلاردىڭ تۇك تاپپاعانداي، ەندى قونايەۆقا تيىسە باستاعانىن قاراشى. سوندىقتان سەندەرگە تاپسىرما - ءبىر كۇننىڭ ىشىندە ول كىسىگە گاراج سالىپ بەرىڭدەر»، - دەدى.
مەن «الما اتا گورستروي» قۇرىلىس كومپانياسىنىڭ ديرەكتورى يگور ميلگرامدى ەرتىپ، گاراج سالاتىن ورىندى بەلگىلەدىك. اپاي- توپاي قيمىلداپ، ءبىر تۇندە گاراجدىڭ باسىن قارايتتىق. كەلەسى كۇنى دىنمۇحاممەد قونايەۆ اعامىزعا زامانبەك نۇرقادىلوۆ گاراجدىڭ كىلتىن اپارىپ بەردى.
زامانبەك اعامىز ديماش احمەت ۇلىنا ەرەكشە قۇرمەتپەن قارايتىن.
ءبىر كۇنى ديمەكەڭنىڭ ۇيىندەگى توڭازىتقىش ىستەمەي قالىپتى. زۋحرا جەڭگەمىز «كازتورگوبورۋدوۆانيە» مەكەمەسىنىڭ ديرەكتورى حوحلوۆقا تەلەفون سوعىپ: «توڭازىتقىشىمىزدى جوندەپ بەرەسىزدەر مە؟» - دەپ ءوتىنىش جاساپتى. سوندا حوحلوۆ: «قونايەۆتىڭ جۇبايى بولساڭ قايتەيىن. كۇيەۋىڭنىڭ داۋرەنى الدەقاشان ءوتىپ كەتتى. ەندى ماعان قونايەۆتان قاراپايىم ءۇي سىپىرۋشى الدەقايدا بيىك»، - دەپ، زۋحرا ءشارىپ قىزىنىڭ نامىسىنا تيەتىن، ودان وزگە دە اۋىر- اۋىر سوزدەر ايتىپتى. مۇنى ەستىگەندە، نۇرقادىلوۆ ورنىنان تۇرىپ كەتىپ، بولمەسىندە ارى- بەرى ءجۇردى دە، وزىنە تەز ارادا حوحلوۆتى الىپ كەلۋدى بۇيىردى. از ۋاقىتتان سوڭ بولمەسىنە كىنالى مىسىقتاي جالتاق- جالتاق قاراۋمەن ەنگەن حوحلوۆقا زاكەڭ: «قونايەۆتىڭ ىسكەرلىگى ارقاسىندا قازاقستاندا بوي كوتەرگەن قىرىق قالانى ايتپاي- اق قويايىن. وسى الماتى قالاسى ءۇشىن ونىڭ قانشاما تەر توككەنىن ۇمىتۋ ازاماتتىققا جاتا ما؟!
بىرىنشىدەن، زۋحرا ءشارىپ قىزىنان بوسپەلىك، رۋحسىزدىق ءسوزىڭ ءۇشىن كەشىرىم سۇرايسىڭ. ەكىنشىدەن، توڭازىتقىشىن ءبىر ساعاتتىڭ ىشىندە جوندەپ بەرەسىڭ. بۇل تاپسىرمام ورىندالماسا، ەكى ساعاتتان كەيىن جۇمىستان كەتەسىڭ. وسى ەكى تالاپتىڭ قايسىسىن ورىندايسىڭ؟» - دەپ، حوحلوۆقا تەسىلە قاراعاندا، ول: «ءبىرىنشىسىن، ءبىرىنشىسىن… وعاش مىنەزىم ءۇشىن زۋحرا ءشارىپ قىزىنان دا، سىزدەن دە كەشىرىم سۇرايمىن» - دەدى، باسىن تومەن ءيىپ.
ديمەكەڭ ءوزىنىڭ كەمەل باسشىعا ءتان پاراساتىمەن، عاجاپ كىشىپەيىلدىلىگىمەن جانە زامانا اعىمىنا ۇندەسەمىن دەپ جىبەرگەن كەيبىر كەمشىلىكتەرىمەن دە قوسا ەسكەرىلۋگە، ارداقتالۋعا ءتيىستى ساياسي تۇلعا ەكەنى داۋسىز.
Bugin.kz
