جامبىلدىقتار ەكىنشى دۇنيەجۇزىلىك سوعىس باتىرلارىن ەسكە الدى - فوتو

تاراز. قازاقپارات - جامبىلدىقتار ەكىنشى دۇنيەجۇزىلىك سوعىس باتىرلارىن ەسكە الدى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

جەڭىس كۇنىندە جامبىل وبلىسىنىڭ اكىمى نۇرجان نۇرجىگىتوۆ تاراز قالاسىنداعى باۋىرجان مومىش ۇلى اتىنداعى «جەڭىس» ساياباعىنداعى باتىردىڭ ەسكەرتكىشىنە گۇل شوقتارىن قويۋ راسىمىنە قاتىستى.

مايدان دالاسىنان قايتا ورالماعانداردى، مارقۇم مايدانگەرلەردى ەسكە الۋ ءۇشىن ارداگەرلەر، تىل ەڭبەككەرلەرىمەن قاتار، ءبىرقاتار جامبىلدىقتار جينالدى. سونىمەن بىرگە، ءىس-شاراعا وبلىستىق ءماسليحات حاتشىسى، قالا اكىمى، قۇقىق قورعاۋ ورگاندارى جانە ەتنومادەني ورتالىقتاردىڭ وكىلدەرى قاتىستى.

جينالعاندار جەڭىس ءۇشىن جانىن قيعان ازاماتتاردى ءبىر مينۋت ۇنسىزدىكپەن ەسكە الدى.

بۇدان سوڭ ايماق باسشىسى باستاعان توپ ساياباقتاعى «دانق» زالىن ارالاپ، كونتسەرتتىك باعدارلامانى تاماشالادى. مۇندا تەاترلاندىرىلعان قويىلىم ساحنالانىپ، پاتريوتتىق اندەر شىرقالدى.

«داڭق» زالى سوعىس جىلدارىن بەينەلەيتىن فوتوسۋرەتتەر مەن ەكسپوناتتارعا تولى. عيماراتتا 1 ميلليون 500 مىڭنان استام فوتوشەجىرە توپتاستىرىلعان. زالدىڭ 1941، 1942، 1943، 1944 جانە 1945 -جىلدارعا ارنالعان قابىرعالارىنداعى سۋرەتتەردە سول كەزەڭدەگى سوعىس كورىنىستەرى بەينەلەنگەن. سونداي-اق، «رەيحستاگقا تۋ تىگۋ» بارەلەفى قويىلىپ، تىلداعى ەڭبەككەرلەردىڭ ومىرىنەن سىر شەرتەتىن سۋرەتتەر دە كورىنىس تاپقان. جەرگىلىكتى مايدانگەرلەردىڭ 500 گە جۋىق مەدالى دە زالدان ورىن العان.

شارا بارىسىندا «جامبىلدىق اسكەري قۇرامالار» اتتى جيناقتىڭ تۇساۋى كەسىلدى.

ايتا كەتەيىك، 2021 -جىلى بايزاق اۋدانى اسكەري ءبولىمى اۋماعىنداعى وق-ءدارى قويماسىندا ورىن العان جارىلىستا ەرلىكپەن قازا بولعان باۋىرجان داۋىتبايەۆ مەملەكەت باسشىسىنىڭ جارلىعىمەن Ⅲ دارەجەلى «ايبىن» وردەنىمەن ناگرادتالدى. وبلىس اكىمى اتالعان وردەندى مارقۇمنىڭ اكەسى تالعات داۋىتبايەۆقا تاپسىردى.