بوكستان الەم چەمپيوناتى: ماحمۇد سابىرحان ەكىنشى جەكپە-جەگىن ءساتتى وتكىزدى

استانا. قازاقپارات - تاشكەنت قالاسىندا بوكستان ەرلەر اراسىندا ءوتىپ جاتقان الەم چەمپيوناتىندا ماحمۇد سابىرحان ەكىنشى جەكپە- جەگىن ءساتتى وتكىزدى، دەپ حابارلايدى قازاقپارات ءتىلشىسى.

الەم چەمپيوناتىنىڭ كۇمىس جۇلدەگەرى م. سابىرحان 54 كەلىگە دەيىنگى سالماقتا ءۇندىستاندىق ساچين سيۆاچپەن قولعاپ ءتۇيىستىردى.

ءبىرىنشى راۋندتا بەس تورەشى جەڭىستى ماحمۇدقا بەرگەنىمەن، ەكىنشى كەزەڭدە تارازى باسى ءۇندىستاندىق بوكسشىعا ءسال اۋدى. دەگەنمەن ءۇشىنشى راۋندتا قازاقستاندىق سپورتشى تىزگىندى قايتا قولعا الدى.

وسىلايشا، م. سابىرحان 5:0 ەسەبىمەن جەڭىسكە جەتىپ، شيرەك فينالعا جولداما الدى.

بۇگىن سونداي-اق قازاقستاندىقتار دۋلات بەكباۋوۆ (67 ك گ)، نۇرقانات رايىس (75 ك گ) تاشكەنت رينگىنە شىعادى.

ەسكە سالا كەتەيىك، بۇدان بۇرىن بوكستان ۇلتتىق قۇراما كاپيتانى اسلانبەك شىمبەرگەنوۆتىڭ شيرەك فينالعا شىققانىن جازعان ەدىك.

سونداي-اق نۇربەك ورالباي شيرەك فينالعا جولداما الدى.