ەلورداداعى ەسىل ءوزىنىڭ جاعالاۋىندا جەڭىس مەرەكەسىنە ارنالعان كونسەرت ءوتتى - فوتو

استانا. قازاقپارات - ەلورداداعى ەسىل وزەنىنىڭ جاعالاۋىندا ورنالاسقان امفيتەاتردا جەڭىس كۇنىنە ارنالعان «وتانعا قىزمەت - ۇلى قۇرمەت» اتتى كونسەرت ءوتىپ جاتىر، دەپ حابارلايدى قازاقپارات ءتىلشىسى.

كونسەرتتە «سارىارقا» حالىق مۋزىكا ءانسامبلى، «ناز» مەملەكەتتىك بي تەاترى، ە. راحماديەۆ اتىنداعى مەملەكەتتىك اكادەميالىق فيلارمونياسىنىڭ ۇرمەلى اسپاپتار وركەسترى، «تەررا» بي تەاترى مەن وزگە دە رەسپۋبليكالىق جانە حالىقارالىق ۆوكال كونكۋرستارىنىڭ جەڭىپمازدارى ونەر كورسەتىپ جاتىر.

«استانا قالالىق مادەنيەت باسقارماسى جانە وعان قاراستى باسقا دا كاسىپورىندارمەن 9-مامىر - جەڭىس كۇنى مەرەكەسىنە ارنالعان كونسەرت وتكىزىپ جاتىرمىز. ءبىرىنشى كەزەكتە ول، ارينە ۇلى وتان سوعىسى مەن تىل ارداگەرلەرىنە ارنالادى. كونسەرتكە استانا قالاسىنىڭ تۇرعىندارى مەن بارشا قوناقتارىن شاقىرامىز. مۇندا ءوزىمىزدىڭ وتاندىق كومپوزيتورلاردىڭ اندەرى مەن سوعىس جىلدارىنداعى تۋىندىلار شىرقالادى. سونىمەن قاتار، م. گوركي اتىنداعى ورىس دراما تەاترىنىڭ ۇجىمى كورەرمەندەر نازارىنا تەاترلىق قويىلىم ۇسىنادى»، - دەپ ءمالىم ەتتى استانا قالالىق مادەنيەت باسقارماسى باسشىسىنىڭ ورىنباسارى نۇران كامزين.

مەرەكەلىك كونسەرتتى تاماشالاۋعا كەلگەن تۇرعىندار مەن قالا قوناقتارىنىڭ قاتارى قالىڭ.

«بۇل جەڭىس وڭاي كەلگەن جوق. ونى ءوسىپ كەلە جاتقان بالالارىمىز ءبىلۋى كەرەك. ۇمىتۋعا بولمايدى! سوندىقتان بۇگىن وسىنداي كونتسەرتكە نەمەرەلەرىمدى اكەلىپ وتىرمىن. جەڭىس مەرەكەسى قۇتتى بولسىن!»، - دەپ پىكىر ءبىلدىردى كونسەرتتى تاماشالاۋعا كەلگەن ەلوردالىق تۇرعىن گۇلزادا ەسەنوۆا.