اقمولالىقتار جەڭىس كۇنىن ءسان-سالتاناتىمەن اتاپ ءوتتى - فوتو
مەرەكەلىك شارا وبلىس اكىمى ەرمەك مارجىقپايەۆ، وبلىستىق ءماسليحات دەپۋتاتتارى، وبلىس اكىمىنىڭ ورىنباسارلارى، سوعىس جانە ەڭبەك ارداگەرلەرى، وبلىستىق جانە قالالىق كاسىپورىن- ۇيىم، مەكەمەلەردىڭ باسشىلارىنىڭ قاتىسۋىمەن كەڭەس وداعىنىڭ باتىرى مالىك عابدۋلليننىڭ ەسكەرتكىشى جانە كەڭەس وداعىنىڭ ەكى مارتە باتىرى تالعات بيگەلدينوۆتىڭ بيۋستىنە گۇل شوقتارىن قويۋ راسىمىمەن باستالدى.
بۇدان كەيىن مەرەكەلىك شارا «ابىلاي حان» الاڭىندا جالعاسىن تاپتى. وندا وسىناۋ مەرەكەنى تويلاۋعا شىققان مىڭداعان اقمولالىق «ۇلى جەڭىسكە تاعزىم!» ادەبي-مۋزىكالىق كومپوزيسياسىن تاماشالادى.
سالتاناتتى ميتينگىدە ءوڭىر باسشىسى ەرمەك مارجىقپايەۆ قۇتتىقتاۋ ءسوز الىپ، ەلىمىزدى زۇلىم جاۋدان قورعاپ قالعان ارداگەرلەردىڭ اتىنا ىزگى تىلەگىن جولدادى.
ايماق باسشىسى اتاپ وتكەندەي، اقمولا وبلىسىنان 90 مىڭ ادام مايدانعا شاقىرىلىپ، 37 مىڭنان ءسال استامى عانا ورالدى. اقمولالىقتار بارلىق مايدانداردا سوعىسىپ، ماسكەۋ، ستالينگراد، كۋرسك دوعاسىنداعى شايقاسقا قاتىستى. ونىڭ ىشىندە 66 اقمولالىق كەڭەس وداعىنىڭ باتىرى جانە داڭق وردەنىنىڭ تولىق كاۆالەرلەرى بولدى.
سونىمەن بىرگە، اسكەري كيىم كيگەن جاستار بي بيلەپ، ءان ايتىپ، مەرەكەنىڭ ءمانىن ودان سايىن اشا ءتۇستى.
العاشقى «قازاقستان - باقىت مەكەنى» كورىنىسى ۇكىلى ىبىراي اتىنداعى اقمولا وبلىستىق فيلارمونياسىنىڭ سوليستەرى سەرىكبولسىن بەكمولدين، اياگوز قالماعانبەتوۆا، ابزال ەس، ايگەرىم داۋلەتحان، بەيبىت اسپان مەن جاڭا قازاقستاندىق پاتريوتيزمدى بەينەلەيتىن «كوكشەتاۋ» مادەنيەت سارايى شىعارماشىلىق ۇجىمدارىنىڭ ورىنداۋىنداعى سەرىك يبراگيموۆتىڭ «وتانىم» انىمەن اشىلدى.
ش. قۇسايىنوۆ اتىنداعى قازاق مۋزىكالىق دراما تەاترى اكتەرلەرىنىڭ ورىنداۋىنداعى «مالىك عابدۋللين» كورىنىسىندە «جاس عابدۋللينشىلەر» كلۋبى، «كوكشەتاۋ» مادەنيەت سارايى حورەوگرافيالىق ۇجىمدارىنىڭ قاتىسۋشىلارىمەن «جەڭىس لەنتاسى» مەرەكەلىك لەنتاسىن ءبىر مەزەتتە تاراتۋ ءراسىمى ۇيىمداستىرىلدى.
«بي - رۋح تىنىسى» كورىنىسىندە اقان سەرى اتىنداعى جوعارى مادەنيەت كوللەدجىنىڭ حورەوگرافيالىق انسامبلدەرى، «كوكشەتاۋ» مادەنيەت سارايىنىڭ «تۇمار»، «سۋۆەنير» حالىقتىق بي انسامبلدەرىنىڭ ورىنداۋىندا سولداتتىق اندەر ورىندالدى.
«ۇلى جەڭىس» كورىنىسى ۇكىلى ىبىراي اتىنداعى اقمولا وبلىستىق فيلارمونياسى، ءبىرجان سال اتىنداعى مۋزىكالىق كوللەدجى بىرلەسكەن حورى، اباي مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ «سىمبات»، «پاليترا» حورەوگرافيالىق انسامبلدەرى، «دوستار» مادەنيەت سارايىنىڭ «اسىل مۇرا»، «اراي» بي انسامبلدەرى مەن حورەوگرافيالىق ۇجىمدارىنىڭ ورىنداۋىنداعى ي. ەلەمەسىنىڭ «جەڭىس كۇنى» انىمەن سۇيەمەلدەندى.
