ەۋروپارلامەنت سەربياداعى قاندى وقيعا قۇرباندارىن ءبىر مينۋت ۇنسىزدىكپەن ەسكە الدى

ستراسبۋرگ. قازاقپارات - دۇيسەنبى كۇنى فرانتسيانىڭ ستراسبۋرگ قالاسىندا ەۋروپارلامەنتتىڭ كەزەكتى كوشپەلى سەسسياسى باستالدى.

سەربيادا ادام ءولتىرۋدىڭ ەكى قايعىلى وقيعاسىنا بايلانىستى ەۋروپارلامەنت دەپۋتاتتارى قازا تاپقانداردى ءبىر مينۋت ۇنسىزدىكپەن ەسكە الدى، دەپ حابارلايدى قازاقپارات ءتىلشىسى.

وتكەن اپتادا سەربيادا ەكى قايعىلى وقيعا بولدى. 3-مامىردا بەلگرادتىڭ ورتالىق اۋداندارىنىڭ بىرىندە 13 جاستاعى جاس ءوسپىرىم ءوز مەكتەبىندە 8 وقۋشى مەن كۇزەتشىنى اتىپ ءولتىردى. جۇما كۇنى كەشكە قاراي 21 جاستاعى ەر ادام بەلگرادتان 40 شاقىرىم جەردەگى دۋبونا كەنتىندە اۆتوماتتان وق جاۋدىرعان. سالدارىنان 8 تۇرعىن كوز جۇمىپ، 14 ادام جاراقات الدى.

ەۋروپارلامەنت پرەزيدەنتى روبەرتا مەتسولا سەربياداعى وسى وقيعالاردىڭ قۇرباندارىن ءبىر مينۋت ۇنسىزدىكپەن ەسكە الۋعا شاقىردى.

«بۇل شابۋىلدارعا كىنالىلەر جاۋاپقا تارتىلۋى ءتيىس»، - دەدى ەۋروپارلامەنت باسشىسى. سونداي-اق ول قايعىلى وقيعادا قازا بولعانداردىڭ وتباسىلارى مەن جاقىندارىنا كوڭىل ايتتى.