اباي وبلىسىندا الاكولگە جولاۋشىلار تاسىمالى ۇيىمداستىرىلادى

اباي. قازاقپارات - اباي وبلىسىندا جازعى كەزەڭدە الاكول كولىنە جولاۋشىلار تاسىمالى ۇيىمداستىرىلادى. بۇل تۋرالى ءوڭىر اكىمدىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

وبلىس اكىمىنىڭ ورىنباسارى ديميتريي گاريكوۆ كەڭەيتىلگەن كەڭەس بارىسىندا ءمالىم ەتكەندەي، قازىر ءۇرجار اۋدانىنىڭ الاكول كولىنىڭ جاعالاۋىندا سۋ بۇرۋ كانالىن سالۋ ءۇشىن جەرلەردى قۇرعاتۋ جۇمىستارى جۇرگىزىلىپ جاتىر.

كول جاعالاۋىن ەلەكترمەن جابدىقتاۋ ماسەلەسى دە شەشىلۋدە. ساراپتاما قورىتىندىسى الىندى. جوبالاردى ىسكە اسىرۋ جاعى قاراستىرىلىپ جاتىر.

جازعى كەزەڭدە الاكول كولىنە جولاۋشىلار تاسىمالى ۇيىمداستىرىلادى: بۇعان دەيىنگىدەي جەلىدە 4 اۆتوبۋس بولادى. سونداي-اق «سەمەي- جالاڭاشكول» ستانتسياسى تەمىرجول مارشرۋتىنا قىزمەت كورسەتۋگە تەندەر وتكىزىلدى. ونىڭ جەڭىمپازى «جولاۋشىلار تاسىمالى» ا ق بولىپ ايقىندالدى. بيىل قۇرامىنا 5 ۆاگون ەنگەن پويىز اپتاسىنا 3 رەت قاتىنايدى.

بۇعان دەيىن حابارلاعانىمىزداي، اباي وبلىسىندا الاكول كولىن دامىتۋ بويىنشا جول كارتاسى جاسالدى. وعان 40 قا جۋىق شارا ەندى.