ماۋلەن اشىمبايەۆ: ايبىندى ارميامىز - ەلدىگىمىز بەن ەگەمەندىگىمىزدىڭ قالقانى

استانا.قازاقپارات – ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاقستاندىقتاردى وتان قورعاۋشى كۇنىمەن قۇتتىقتادى، دەپ حابارلايدى قازاقپارات.

قۇتتىقتاۋىن سەنات ءتوراعاسى ءوزىنىڭ Facebook پاراقشاسىندا جاريالادى.

«قۇرمەتتى دوستار!

بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن!

بۇل - باتىر بابالارىمىزدىڭ ەرلىك ءداستۇرىن جانە ساپ تۇزەگەن ساربازدارىمىزدىڭ جاۋىنگەرلىك رۋحىن دارىپتەيتىن مەرەكە. وسى كۇنى وتاندى ءسۇيۋ، ەلگە قىزمەت ەتۋ، انتقا ادال بولۋ سياقتى قاستەرلى قۇندىلىقتاردىڭ دا ماڭىزى ايشىقتالا تۇسەدى. مۇنىڭ ءبارى ازاماتتارىمىزدىڭ پاتريوتتىق سەزىمىن ارتتىرىپ، وسكەلەڭ ۇرپاقتىڭ وجەت، قايسار بولىپ قالىپتاسۋىنا وڭ اسەرىن تيگىزەتىنى انىق.

مەملەكەت باسشىسى قاسىم- جومارت كەمەل ۇلى توقايەۆ بۇكىلارميالىق كەڭەستە سويلەگەن سوزىندە قارۋلى كۇشتەرىمىز مەملەكەتتىلىگىمىزدىڭ مىزعىماس تىرەگى ەكەنىن اتاپ ءوتتى. شىن مانىندە، ءبىزدىڭ ايبىندى ارميامىز - ەلدىگىمىز بەن ەگەمەندىگىمىزدىڭ بەرىك قالقانى. سوندىقتان ءبىز وتان قورعاۋ دەيتىن مارتەبەلى مىندەتتى ابىرويمەن اتقارىپ كەلە جاتقان اسكەرىمىزدى ءاردايىم ماقتان تۇتامىز.

مەرەكەمەن قۇتتىقتاي وتىرىپ، ءار شاڭىراققا شاتتىق، قۋانىش، بەرەكە تىلەيمىن. ەلىمىز امان، جۇرتىمىز تىنىش بولسىن! قارۋلى كۇشتەرىمىزدىڭ الەۋەتى ارتىپ، قورعانىسىمىز كۇشەيە بەرسىن!»، - دەپ جازدى ماۋلەن اشىمبايەۆ.