جەتىسۋ وبلىسىندا سيۆەرس الماسىنىڭ تۇقىمىن ساقتاپ قالۋعا ارنالعان فەستيۆال ءوتتى

جىلداعى ءداستۇر بويىنشا تەرەكتى وزەنىنىڭ جاعاسىندا سيۆەرس الماسىنىڭ گۇلدەنۋىنە ارنالعان فەستيۆال ءوتتى. شارانىڭ باستى ماقساتى - جابايى الما اعاشتىڭ وسى تۇقىمىنىڭ جويىلىپ كەتپەۋىنە جاعداي جاساۋ ارقىلى وڭىردەگى تاۋ ءتۋريزمىن دامىتۋ.
تاۋ جاعالاي وسەتىن بۇل جابايى المانىڭ ءتۇرىن تەك سارقان جەرىندە كەزدەستىرۋگە بولادى. بور داۋىرىنەن وسى كۇنگە دەيىن ساقتالىپ كەلگەن جابايى المانىڭ 40 قا جۋىق ءتۇرى جوڭعار- الاتاۋى تابيعي ۇلتتىق پاركىنىڭ اۋماعىندا ەرەكشە قورعالعان. بۇگىندە، تابيعي ساياباقتىڭ 38 مىڭ گەكتارىن جابايى سيۆەرس الماسى الىپ جاتىر.
شارا اياسىندا «التىن ادام» جەتىسۋ شەبەرلەرى قولونەر بۇيىمدارىنىڭ كورمەسى ءوتتى. ۇلتتىق سپورت تۇرلەرىنەن تارتىسقا تولى جارىس تا ۇيىمداستىرىلدى.
سالتاناتتى شارا شىمىلدىعىن اۋدان اكىمى عالىمجان قانات ۇلى اشىپ، جيىلعان جۇرتشىلىقتى مەرەكەمەن قۇتتىقتادى. سونىمەن قاتار، فەستيۆالگە قازاق ەستراداسىنىڭ جاس انشىلەرى Kalifarniya جانە «قازاقستان داۋىسى» مەگا جوباسىنىڭ قاتىسۋشىسى Qanay كەلىپ، اسەم اندەرىنەن شاشۋ شاشتى.
«قازاقستاننىڭ بارلىق جەرى وزىنە ءتان سۇلۋلىعىمەن كوركەم تابيعاتىمەن ەرەكشەلەنەدى. سونىڭ ىشىندەگى جەر ءجانناتى سانالاتىن جەتىسۋدىڭ تابيعاتىنا تامسانبايتىن ادام جوق. بۇگىنگى فەستيۆال دە جەتىسۋدىڭ تاعى ءبىر اسەم جەرى سارقاندا جوعارعى دەڭگەيدە ءوتتى. ءبىزدىڭ باستى ماقساتىمىز - جابايى الما تۇقىمىن ساقتاپ قالۋ. بۇكىل الەمگە وسى جەردىڭ بارلىق المانىڭ ەجەلگى ءتۇپ اتاسى ەكەندىگىن ودان ءارى پاش ەتۋ. ارينە، بۇدان بولەك ەكولوگيالىق ءتۋريزمدى دامىتۋعا جاعداي جاساۋ»، - دەدى ەكولوگيا جانە تۇراقتى دامۋ ينستيتۋتىنىڭ ديرەكتورى قۇرالاي كاريبايەۆا.
بۇگىنگى فەستيۆال اياسىندا 100 ءتۇپ الما اعاش كوشەتى وتىرعىزىلدى.