اتىراۋ وبلىسىندا ءبىلىم مەكەمەلەرى بالالارعا ءدىني ناسيحات جۇرگىزگەن
وبلىستىق ءبىلىم باسقارماسىنىڭ مالىمەتىنشە، 82 بالا تۇراتىن «اقجايىق»، «ايشا انا»، «بەرەكە»، «ەدىل»، «سارايشىق» ءبىلىم بەرۋ قايىرىمدىلىق مەكەمەلەرى 82 بالاعا ءدىني ناسيحات جۇرگىزۋمەن اينالىسقان. تەكسەرۋ بارىسىندا مەكەمەلەردە ءدىني ساۋاتتىلىققا ۇيرەتەتىن ستەندتەر، ادەبيەتتەر تابىلعان.
ال اتا- انالارمەن كەزدەسۋ كەزىندە ولار بۇل ۇيىمداردى مەدرەسە دەپ اتايتىنى انىقتالدى. بالالار مۇندا اتا- انالارىنىڭ سەنىمحاتى نەگىزىندە تۇرادى. الايدا، بۇل - زاڭسىز. ءبىلىم باسقارماسى بارلىق قۇزىرەتتى ورگاندارعا حات جولداعان. قازىر زەرتتەۋ توبى قۇرىلدى.
«تەكسەرۋ ناتيجەسىندە مەكەمەلەردە قاۋىپسىزدىك شارالارى ساقتالماعانى، پسيحيكالىق جانە فيزيكالىق دامۋ ءۇشىن قولايلى جاعدايلار بولماعانى انىقتالدى. بالالاردىڭ تۇرۋى ءۇشىن قاجەتتى جاعدايلار جاسالماعان. شتاتتا ءپان مۇعالىمدەرى بولماعان. اتا- انالارمەن كەزدەسۋ ۇيىمداستىرىلدى. ولارعا بالالارى ءۇشىن بۇل جەردە بولۋ قاۋىپسىز ەمەس ەكەنى ەسكەرتىلدى. ءىس جۇزىندە باسقارما ءتيىستى شارالار قابىلدادى. قايىرىمدىلىق مەكەمەلەرىنىڭ قىزمەتكەرلەرىنە بالالاردى ۇيگە جىبەرۋ تۋرالى ۇسىنىستار بەرىلدى. ءبىلىم بەرۋ مەكەمەلەرى تەك زاڭ اياسىندا جۇمىس ىستەۋى كەرەك»، - دەپ حابارلادى وبلىستىق ءبىلىم باسقارماسىنان.
ەسكە سالا كەتەلىك، بۇعان دەيىن اتىراۋدا بالالار اۋىلىنىڭ ديرەكتورى جۇمىسىنان شەتتەتىلگەنىن حابارلاعان بولاتىنبىز. اتىراۋ وبلىستىق ءبىلىم باسقارماسى باسشىسىنىڭ بۇيرىعىمەن وتباسىلىق ۇلگىدەگى «شاڭىراق» بالالار اۋىلىنىڭ ديرەكتورى گۇلسارا بوتاتايەۆا تەرگەۋ جۇرگىزۋ ۋاقىتىنا اتقاراتىن قىزمەتىنەن شەتتەتىلدى.
«بالالار ءۇيى تاربيەلەنۋشىلەرىنىڭ وتىنىشىنەن كەيىن ق ر قىلمىستىق كودەكسىنىڭ 140-بابىمەن («كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ») سوتقا دەيىنگى تەرگەۋ باستالدى. تەرگەۋ اياقتالىپ، وقيعانىڭ بارلىق ءمان- جايى انىقتالعاننان كەيىن ديرەكتوردىڭ جۇمىسىن جالعاستىرۋ تۋرالى شەشىم قابىلدانادى»، - دەپ حابارلادى باسقارمانىڭ باسپا ءسوز قىزمەتى.
