توقتاعان ءوندىرىس، ىزدەۋدەگى باسشى: «ازيا اۆتونىڭ» وتكەنى مەن بۇگىنى
تاريحىنا ۇڭىلسەك
اۋەلى حولدينگتىڭ قالاي قۇرىلعانىنا ازدى- كەم كوز جۇگىرتىپ وتسەك. «بيپەك اۆتو - ازيا اۆتو» تاريحى 1992 -جىلدان باستالادى. وسكەمەندىك كاسىپكەر اناتولي بالۋشكين سول كەزدەرى تاپشى بولعان ۆاز كولىكتەرىن قالاعا جەتكىزۋمەن اينالىسۋدى ماقسات ەتەدى. ءىسى العا باسقان ول 1996 -جىلى تەك وسكەمەنمەن شەكتەلمەي، 4 قالاعا قانات جايعان.
اراعا 4-5 جىل سالىپ LADA جانە SKODA اۆتوكولىكتەرىن يمپورتتاپ، قازاقستاننىڭ بارلىق ءىرى شاھارىندا اۆتوورتالىقتار قۇرادى. جوبالارىن جۇزەگە اسىرۋ ءۇشىن ۇكىمەتتەن مول قاراجات الادى. ءسويتىپ، «بيپەك اۆتو - ازيا اۆتو» ەلدەگى كولىك قۇراستىراتىن ءىرى حولدينگكە اينالادى. تەك شىعىس قازاقستاننىڭ وزىندە مۇقىم ەلدى ەلەڭ ەتكىزگەن جاعدايلار بولماي تۇرىپ مۇندا 5 مىڭعا جۋىق ادام جۇمىس ىستەگەن.
ەندى سول جاعدايلاردىڭ قالاي جانە نەدەن باستالعانىن ەسكە ءتۇسىرىپ كورەلىك. 2020 -جىلى ق ر يندۋستريا جانە ينفراقۇرىلىمدىق دامۋ مينيسترلىگى اتالعان حولدينگكە قانشاما جىل بويى مەملەكەت تاراپىنان قوماقتى قارجى بولىنگەنىمەن ونىڭ وزىنە جۇكتەلگەن مىندەتتەردى دۇرىس ورىنداماعانىن مالىمدەدى.
«ق ر ي ي د م جانە «ازيا اۆتو» ا ق اراسىندا جاسالعان 2017 -جىلعى 7-ساۋىردەگى ونەركاسىپتىك جيناستىرۋ تۋرالى كەلىسىم جانە 2019 -جىلعى 4-قاراشاداعى №1 قوسىمشا كەلىسىم استانا قالاسىنداعى مامانداندىرىلعان اۋدانارالىق ەكونوميكالىق سوتتىڭ 2020 -جىلعى 24-تامىزداعى №7119-20-00-2/6894 شەشىمىمەن كۇشىن جويىپ، حولدينگ تاراپىنان مىندەتتەمەلەرىن ورىنداماعانى ءۇشىن بۇزىلدى. مەملەكەتتىك پرەفەرەنتسيالاردىڭ بولماۋى كاسىپورىننىڭ اعىمداعى وندىرىسىنە جانە جۇمىس ۇدەرىسىنە ەش اسەر ەتپەيدى. كەلىسىمنىڭ بۇزىلۋى حولدينگ باسشىلىعىن بۇعان دەيىن وزدەرىنە العان مىندەتتەمەلەرىن ورىنداۋعا ىنتالاندىرۋ ءۇشىن جاسالدى. كومپانيا قۇرىلعان ساتتەن باستاپ 18 جىل بويى وندىرىسىنە قولداۋ كورسەتىلىپ كەلدى. ءبىراق، ءوندىرىستى مودەرنيزاتسيالاۋ جانە قازاقستاندىق قامتۋ دەڭگەيىن ارتتىرۋ جونىندەگى كەلىسىمدە كوزدەلگەن مىندەتتەمەلەرىن ورىندامادى»، - دەگەن ەدى سول كەزدە مينيسترلىكتىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ ءتوراعاسى بولعان مارات قارابايەۆ (قازىرگى ي ي د م باسشىسى - رەد.).
وسىدان كەيىن اناتولي بالۋشكين وسكەمەندە «گالستۋكسىز كەزدەسۋ» وتكىزەمىن دەپ جۋرناليستەردى جينادى. سوندا مينيسترلىكتىڭ جاساعان مالىمدەمەسىنىڭ شىندىققا مۇلدە جاناسپايتىنىن ايتىپ، كومپانيادا جۇمىس ىستەيتىن مىڭداعان ادامنىڭ نارازىلىققا شىعۋى مۇمكىن ەكەنىن جەتكىزدى. الايدا ىسكە قاتىستى تەرگەۋ باستالعاندا بالۋشكيننىڭ ەلدەن كەتىپ قالعانى جايلى حابار تارادى. سودان سوڭ باس پروكۋراتۋرا ميللياردەرگە ىزدەۋ جاريالادى.
«ازيا اۆتو» اق كومپانيالار توبىنىڭ نەگىزگى اكسيونەرى جانە ديرەكتورلار كەڭەسىنىڭ ءتوراعاسى ا. م. بالۋشكيندى ق ر قىلمىستىق كودەكسىنىڭ 190-بابى 4-بولىگىنىڭ 2-تارماعىنا سايكەس، «قاماۋ» تۇرىندەگى بۇلتارتپاۋ شاراسىنا سانكسيا بەرىلدى. وعان حالىقارالىق ىزدەۋ جاريالاندى. كۇدىكتىنىڭ ءوز ازاماتتىعىن وزگەرتۋىنە قاتىستى ءمان- جاي دا تەكسەرىلىپ جاتىر»، - دەلىنگەن سونداعى باس پروكۋراتۋرانىڭ باسپا ءسوز قىزمەتى تاراتقان مالىمەتتە.
باسشىلارىنىڭ ءبىرى چەحيادا ۇستالدى
حولدينگ جۇمىسىنىڭ توقتاۋىنا بايلانىستى شىعىس قازاقستاندا جۇمىسسىز قالعان 5 مىڭ ادامنىڭ ماسەلەسىن شەشۋگە ءوڭىر بيلىگى دەن قويدى. 2021 -جىلدىڭ باسىنان بەرى تالاي جينالىس، كەزدەسۋ ءوتىپ، قىزۋ كەلىسسوزدەر جۇرگىزىلىپ، قاراشا ايىنا قاراي تۇگەل دەرلىك جاڭا جۇمىسقا ورنالاستىرىلدى.
سول جىلى كۇزدە وسكەمەندەگى «ازيا اۆتو قازاقستان» كومپانياسىنىڭ باسشىسى انتون نەناحوۆ ورماندا اسىلىپ تۇرعان كۇيىندە تابىلدى. وبلىستىق پوليتسيا دەپارتامەنتى وسىعان بايلانىستى وسكەمەن قالالىق پوليتسيا باسقارماسى ەرتىس پوليتسيا ءبولىمىنىڭ ق ر قىلمىستىق كودەكسىنىڭ 105-بابى 1-بولىگىمەن (ءوزىن- ءوزى ولتىرۋگە يتەرمەلەۋ) سوتقا دەيىنگى تەرگەۋ امالدارىن باستاعانىن حابارلاعان- تۇعىن. ءبىر ايتا كەتەرلىگى، كومپانيادا 2013 -جىلدان بەرى جۇمىس ىستەگەن مارقۇم باسشىلىق لاۋازىمعا 2021 -جىلدىڭ تامىزىندا عانا كەلگەن. ياعني، تەك ءبىر ايعا جەتەر- جەتپەس ۋاقىت قانا وسى قىزمەتتە بولدى.
2022 -جىلدىڭ باسىندا «بيپەك اۆتو - ازيا اۆتو» حولدينگى باسشىلارىنىڭ ءبىرى چەحيادا ۇستالدى.
«چەحيا استاناسى پراگادا قازاقستان ءى ءى م ينتەرپول ۇلتتىق ورتالىق بيۋروسىنىڭ سۇراۋى بويىنشا اسا ءىرى مولشەردە الاياقتىق جاساعانى ءۇشىن شقو ەكونوميكالىق قىلمىستار دەپارتامەنتى ىزدەۋ سالعان «بيپەك اۆتو - ازيا اۆتو» كومپانيالار توبى باسشىلارىنىڭ ءبىرى ۇستالدى»، - دەدى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك.
بىلتىرعى جازدا ەكونوميكالىق رەسۋرستاردىڭ زاڭسىز شوعىرلانۋىمەن كۇرەس جونىندەگى كوميسسيا كاسىپكەر اناتولي بالۋشكيننىڭ 77 جىلجىمايتىن جانە 1 مىڭ جىلجىمالى مۇلكىن سوتقا دەيىن تاركىلەۋ تۋرالى ءوتىنىشحاتتىڭ سوتقا جىبەرىلگەنىن حابارلاعان.
2023 -جىلدىڭ اقپان ايىندا قارجىلىق مونيتورينگ اگەنتتىگى «ازيا اۆتو» ا ق باسشىسىن سوتقا شاقىردى.
«قازاقستاننان تىس جەردە جۇرگەن جانە كەلۋدەن جالتارىپ جۇرگەن كۇدىكتى 1970 -جىلى تۋعان اناتولي بالۋشكين 10-اقپاندا ساعات 17:00-گە دەيىن وسكەمەن قالاسى، نوۆاتوروۆ كوشەسى، 7/2 مەكەنجايىندا ورنالاسقان شىعىس قازاقستان وبلىسى بويىنشا ەكونوميكالىق تەرگەۋ دەپارتامەنتىنىڭ اكىمشىلىك عيماراتىنا كەلۋى قاجەت. تەرگەۋ ارەكەتتەرىنە قاتىسۋ ءۇشىن كۇدىكتى ا. م. بالۋشكين قورعاۋشىنى ءوز بەتىنشە شاقىرۋعا نەمەسە قىلمىستىق پروتسەستى جۇرگىزەتىن ورگاننىڭ قورعاۋشىنىڭ قاتىسۋى تۋرالى ءوتىنىشحات بەرۋگە (ق ر ق پ ك- ءنىڭ 68-بابى) قۇقىلى. قورعاۋشىنى كۇدىكتى نەمەسە ونىڭ زاڭدى وكىلدەرى، ولاردىڭ اتىنان وزگە دە ادامدار شاقىرماسا، قورعاۋشىنىڭ قاتىسۋىن قىلمىستىق پروتسەستى جۇرگىزەتىن ورگان قامتاماسىز ەتەدى (ق ر ق پ ك- ءنىڭ 67-بابى)»، - دەلىنگەن اگەنتتىك حابارلاماسىندا.
وسى رەتتە، قازاقپارات ءتىلشىسى ش ق و بويىنشا ەكونوميكالىق تەرگەۋ دەپارتامەنتىنە حابارلاسىپ كوردى. دەپارتامەنتتىڭ باسپا ءسوز قىزمەتى سول كۇنى اناتوليي بالۋشكيننىڭ كەلمەگەنىن ءمالىم ەتتى.
3 -مامىر كۇنى ق ر قارجىلىق مونيتورينگ اگەنتتىگى «بيپەك اۆتو - ازيا اۆتو» ا ق ديرەكتورلار كەڭەسىنىڭ ءتوراعاسى اناتولييبالۋشكينگە، اتالعان اق- نىڭ باس ديرەكتورى ەرىك ساعىمبايەۆقا جانە كومپانيالار توبىنىڭ توپ- مەنەدجەرلەرىنە قاتىستى سوتقا دەيىنگى تەرگەۋدىڭ جالعاسىپ جاتقانىن حابارلادى.
«ا. بالۋشكين مەن ە. ساعىمبايەۆ بانكتىك قارىزداردى وتەۋدەن جانە بيۋدجەتكە سالىق تولەۋدەن جالتارۋ ماقساتىندا جىمقىرعان. ۇرلانعان اقشا ءوندىرىستى % 50 لوكاليزاتسيالاۋ شارتىمەن اۆتوكولىك قۇرالدارىن ونەركاسىپتىك قۇراستىرۋ زاۋىتىن سالۋعا ارنالعان بولاتىن. ولار قاراجاتتى بانكتە كەپىلدەگى تاۋارلاردى باقىلاۋىنداعى كومپانيالارعا قايتا رەسىمدەۋ، «ازيا- بيپەك اۆتو» كومپانيالار توبىنىڭ قىزمەتكەرلەرىنە جالعان سىيلىق اقىلار بەرۋ جانە بىرىككەن اراب امىرلىكتەرىندەگى كومپانيامەن جالعان كەلىسىمشارت جاساسۋ ارقىلى شوتتان شىعارىپ العان»، - دەلىنگەن اگەنتتىكتىڭ باسپا ءسوز قىزمەتى تاراتقان مالىمەتتە.
سوتتىڭ سوڭعى شەشىمىن كۇتۋدە
تالاي جىل دۇرىلدەپ تۇرعان حولدينگتىڭ قازىرگى جاعدايىنان، الداعى تاعدىرىنان قانداي دا ءبىر حابار بار- جوعىن ءبىلۋ ءۇشىن ءوڭىر اكىمدىگىنە جۇگىندىك. بەلگىلى بولعانداي، سوت پروتسەسى ءجۇرىپ جاتقاندىقتان ازىرگە «بيپەك اۆتو - ازيا اۆتو- نىڭ» شىعىس قازاقستان اۋماعىنداعى بارلىق زاۋىتىنىڭ جۇمىسى توقتاپ تۇر. ايماق باسشىسى دانيال احمەتوۆ ءساۋىر ايىنىڭ ورتاسىندا وتكەن حالىق الدىندا ەسەپ بەرۋ كەزدەسۋىندە بۇل ماسەلە تۋرالى سۇراققا جاۋاپ بەردى.
«ءبىز مۇنداي ۇلكەن وندىرىستەن ايىرىلىپ قالعىمىز كەلمەيدى. سوت پروتسەدۋرالارى اياقتالا سالىسىمەن زاۋىتتى قايتا جانداندىرۋ ءۇشىن بار كۇشىمىزدى سالامىز. ازىرگە سوتتىڭ سوڭعى شەشىمىن كۇتۋىمىز كەرەك. الداعى ۋاقىتتا وسى باعىتتا جۇمىس ىستەيتىن كومپانيا تابىلادى دەپ سەنەمىن»، - دەدى اكىم.
بۇل ورايدا كوپتىڭ كوكەيىندەگى جۇرگەن بىردەن- ءبىر ماسەلە - اناتولي بالۋشكينگە تيەسىلى بولعان دەمالىس بازالارىنىڭ تاعدىرى. سوت باستالعالى بەرى «راحمان قاينارلارى» ساناتوريى، «نۇرتاۋ» شيپاجايى جانە «پورت- فورتۋنا» دەمالىس بازاسى جۇمىسىن توقتاتقان. جۇرت بۇل دەمالىس ورىندارىنىڭ جابىلماۋىن تىلەيدى. سوعان وراي ش ق و اكىمدىگى قۇزىرلى ورگاندارمەن كەلىسسوز جۇرگىزىپ، بيىل «نۇرتاۋ» دەمالىس بازاسىنىڭ اشىلۋىنا قول جەتكىزدى.
«نۇرتاۋ» بازاسىنا اشىلا سالىسىمەن مىڭداعان ادام بارىپ جاتىر. ەندى «راحمان قاينارلارى» ساناتوريى دە جۇمىس ىستەۋى ءۇشىن كەلىسسوزدەر جۇرگىزىپ جاتىرمىز. ول دا وسىلاي ەل يگىلىگىنە بەرىلەدى دەگەن سەنىمدەمىن»، - دەدى د. احمەتوۆ.
دەمالىس بازالارىنا قاتىستى ماسەلەنىڭ انىق- قانىعىن ءبىلۋ ءۇشىن شىعىس قازاقستان وبلىسىنىڭ كاسىپكەرلىك جانە يندۋستريالىق- يننوۆاتسيالىق دامۋ باسقارماسىنا رەسمي سۇراۋحات جولداپ كوردىك.
«وبلىستىق ەكونوميكالىق تەرگەۋ دەپارتامەنتى «بيپەك اۆتو - ازيا اۆتو- نىڭ» كومپانيالار توبىنىڭ لاۋازىمدى تۇلعالارىنا قاتىستى قىلمىستىق ءىس قوزعاعان. مۇلىكتىك زالالدى وتەۋ جانە ازاماتتىق تالاپتى وتەۋ بولىگىندە ۇكىمنىڭ ورىندالۋىن قامتاماسىز ەتۋ ءۇشىن كومپانيا مۇلكىنە ارەست قويىلعان. قازىرگى ۋاقىتتا قىلمىستىق پروتسەسكە قاتىسۋشىلارعا تەرگەۋ ارەكەتتەرىنىڭ اياقتالعانى تۋرالى حابارلاندى جانە ءىس ماتەريالدارى تانىسۋعا بەرىلدى. ناتيجەلەرى بويىنشا ءىس ءمان- جايدى قاراۋ ءۇشىن پروكۋراتۋراعا جانە سوتقا جىبەرىلەدى. وزگە اقپارات ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتىلۋگە جاتپايدى، - دەلىنگەن باسقارما باسشىسى ەلدوس بايراحمەتوۆ جولداعان جاۋاپتا.
P/s: ءۇش جىلعا جۋىق ۋاقىت وتسە دە نۇكتەسى ءالى قويىلماعان «بيپەك اۆتو - ازيا اۆتو» حولدينگىنە قاتىستى ماسەلەنىڭ بۇگىنگى ءتۇيىنى وسىنداي. سوت شەشىمى شىقپاي تۇرىپ، كومپانيا جۇمىسى جاندانا قويمايتىنى انىق. وقيعانىڭ ارى قاراي ءوربۋى ءتىلشى نازارىندا بولادى.
