ءاليحان سمايىلوۆ تاشكەنتتە وزبەكستان پرەزيدەنتىمەن كەزدەستى

استانا. قازاقپارات- تاشكەنتتە قازاقستان پرەمەر- ءمينيسترى ءاليحان سمايىلوۆ پەن وزبەكستان پرەزيدەنتى شاۆكات ميرزيەيەۆ كەزدەستى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.

ءاليحان سمايىلوۆ مەملەكەت باسشىسى قاسىم- جومارت توقايەۆتىڭ ىستىق سالەمىن جەتكىزىپ، قازاقستان مەن وزبەكستاننىڭ اراسىنداعى ەكىجاقتى قارىم- قاتىناس سەنىم مەن ءوزارا تۇسىنىستىككە نەگىزدەلگەن ستراتەگيالىق ارىپتەستىكتىڭ جارقىن ۇلگىسى ەكەنىن اتاپ ءوتتى. اتاپ ايتقاندا، جوعارى دەڭگەيدە وتكەن سوڭعى كەلىسسوزدەر قورىتىندىسى بويىنشا قول جەتكىزىلگەن ۋاعدالاستىقتاردى ىسكە اسىرۋ - ەكى ەل ۇكىمەتتەرىنىڭ ەرەكشە باقىلاۋىندا.

سونىمەن قاتار پرەمەر- مينيستر ەكىجاقتى ىنتىماقتاستىق جونىندەگى ۇكىمەتارالىق كوميسسيانىڭ 20-وتىرىسىنىڭ قورىتىندىسى تۋرالى حاباردار ەتتى، وندا ونەركاسىپ، اۋىل شارۋاشىلىعى، ەنەرگەتيكا، ەكولوگيا، ترانزيتتىك- كولىك سالاسىنداعى جانە ت. ب. ءوزارا ءىس- قيمىل ماسەلەلەرى ەگجەي- تەگجەيلى تالقىلاندى. ءوزارا ساۋداداعى تاۋارلار نومەنكلاتۋراسىن كەڭەيتۋ، جاڭا ينۆەستيتسيالىق جانە كووپەراتسيالىق جوبالاردى ىسكە قوسۋ جونىندەگى جۇمىستى جالعاستىرۋ جونىندە ۋاعدالاستىقتارعا قول جەتكىزىلدى.

قازاق- وزبەك شەكاراسىندا ەكى ەلدىڭ ونەركاسىپ سالاسىنداعى ءتيىمدى ءوزارا ءىس- قيمىلىنا سەرپىن بەرەتىن «ورتالىق ازيا» حالىقارالىق ونەركاسىپتىك كووپەراتسيا ورتالىعىن سالۋدىڭ ماڭىزدىلىعى ەرەكشە اتاپ ءوتىلدى.

كەزدەسۋ قورىتىندىسى بويىنشا مەملەكەتارالىق ىنتىماقتاستىقتى ودان ءارى دامىتۋ ءۇشىن ەكى ەلدىڭ ۇكىمەتتەرى بەلسەندى جۇمىستى جالعاستىرۋعا دايىن ەكەندىگى ايتىلدى.

وسىعان دەيىن قازاقستان مەن وزبەكستان ءوزارا تاۋار اينالامىن 10 ميلليارد دوللارعا جەتكىزۋدى كوزدەپ وتىرعانىن جازدىق.