جاۋىنگەرلەر اراسىندا قاتىگەزدىك پەن الىمجەتتىككە جول بەرمەۋىمىز كەرەك - مەملەكەت باسشىسى

استانا. قازاقپارات - مەملەكەت باسشىسى قاسىم- جومارت توقايەۆ بۇكىل ارميالىق كەڭەستىڭ وتىرىسىندا جاۋىنگەرلەر اراسىندا قاتىگەزدىك پەن الىمجەتتىككە جول بەرمەۋ كەرەكتىگىن باسا ايتتى، دەپ حابارلايدى قازاقپارات ءتىلشىسى.

«ساربازدارىمىز قايسار، باتىل، سونداي- اق ءبىلىمدى بولۋى شارت. جاۋىنگەرلەردىڭ بويىنا وتانشىلدىق، ادامگەرشىلىك، ىزگىلىك قاسيەتتەردى ءسىڭىرۋىمىز كەرەك. ولار ناعىز ازامات دەگەن اتقا لايىق بولۋى قاجەت. ءبىر سوزبەن ايتساق، ارميا - بۇل رۋحاني تاربيە ورتالىعى»، - دەدى پرەزيدەنت.

قاسىم- جومارت توقايەۆ بۇل ىستە اعا بۋىننىڭ تاجىريبەسىن پايدالانۋ ماڭىزدى ەكەنىن اتادى.

«ءبىز قاتىگەزدىك، الىمجەتتىك سياقتى قوعامعا قاۋىپتى ۇردىستەرگە جول بەرمەۋىمىز كەرەك. بۇگىن وسى جەردە ارداقتى ارداگەرلەرىمىز وتىر. ولاردىڭ تاجىريبەسى، كورگەن- تۇيگەنى مول. ءبىز ارداگەرلەرگە زور قۇرمەت كورسەتەمىز. اعا بۋىننىڭ تاجىريبەسىن جاس ساربازداردى تاربيەلەۋ ىسىنە ءتيىمدى پايدالانعان ءجون»، - دەدى مەملەكەت باسشىسى.

وسىعان دەيىن پرەزيدەنت ارميانىڭ ەگەمەندىگىمىزدى قورعاۋعا ءاردايىم دايىن بولۋ قاجەتتىگىن ايتتى.