شەكارانى كۇزەتۋدىڭ جاڭا تەحنيكالىق قۇرالدارى سىناقتان ءوتىپ جاتىر - ەرلان الداجۇمانوۆ

استانا. قازاقپارات - شەكارانى كۇزەتۋدىڭ جاڭا تەحنيكالىق كەشەندەرى قۇرىلدى.

بۇل تۋرالى ەلوردادا بۇكىل ارميالىق كەڭەستىڭ وتىرىسىندا ق ر ۇ ق ك ءتوراعاسىنىڭ ورىنباسارى - شەكارا قىزمەتىنىڭ ديرەكتورى، گەنەرال- مايور ەرلان الداجۇمانوۆ ايتتى، دەپ حابارلايدى قازاقپارات ءتىلشىسى.

«بەلسەندى ءىس- قيمىل باعىتىندا شەكارا ۋچاسكەلەرىن ينجەنەرلىك جابدىقتاۋ جالعاسىپ كەلەدى. سونىمەن قاتار، شەكارانى كۇزەتۋدىڭ جاڭا تەحنيكالىق قۇرالدارى، زاماناۋي قارۋ- جاراق پەن تەحنيكا ۇلگىلەرى سىناقتان ءوتىپ جاتىر. شالعايدا ورنالاسقان جەرلەردە پيلوتسىز ۇشۋ اپپاراتتارى جانە موبيلدىك بەينەباقىلاۋ كەشەنى قولدانىلىپ جاتىر. كەيبىر ۋچاسكەلەردە تەرموۆيدەو مەن بەينەباقىلاۋ جابدىقتارىن قولدانا وتىرىپ، شەكارانىڭ ۇزىن ۋچاسكەلەرىن كۇزەتۋدىڭ تەحنيكالىق كەشەندەرى قۇرىلعان»، - دەدى ە. الداجۇمانوۆ.

ونىڭ ايتۋىنشا، 2020 -جىلدان باستاپ شەكارانى كۇزەتۋدە ارنايى ماقساتتاعى بولىمشەلەر قۇرىلدى.

بۇدان بۇرىن حابارلانعانداي، مەملەكەت باسشىسى قاسىم- جومارت توقايەۆتىڭ قاتىسۋىمەن وتەتىن بۇكىل ارميالىق كەڭەستىڭ وتىرىسى باستالدى.

قورعانىس ءمينيسترى رۋسلان جاقسىلىقوۆ 250 اسكەري قىزمەتشى افريكاداعى ميسسياعا دايىندالىپ جاتقانىن ايتتى.