ۇلتتىق بانك بيرجا ساۋداسىندا پايدا بولعان الاياقتار تۋرالى ەسكەرتتى

«قازاقستان رەسپۋبليكاسىنىڭ ۇلتتىق بانكى ءوزىن ينۆەستيتسيالىق قىزمەتپەن اينالىساتىن كومپانيا رەتىندە تانىستىراتىن الاياق توپتاردىڭ كوبەيگەنىن ەسكەرتەدى. مۇنداي توپتار بيرجا ساۋداسىندا تەز اقشا تابۋدىڭ قاراپايىم تاسىلدەرىن سيپاتتايتىن جارنامالىق روليكتەرگە تولى سايتتار مەن موبيلدىك قوسىمشالاردى جاسايدى. الايدا، ولار سيپاتتايتىن قارجىلىق دامۋعا قاتىستى باعدارلاما شىن مانىندە جوق.
مۇنداي رەسۋرستار الەۋمەتتىك جەلىلەردە، سونىڭ ىشىندە YouTube ۆيدەوحوستينگىندە جارناما ارقىلى بەلسەندى تۇردە ناسيحاتتالىپ ءجۇر.
الاياقتىق نەگىزگە قۇرىلعان مۇنداي سايتتاردا تانىمال تۇلعالاردىڭ اتىنان جالعان اقپارات، قولدان جاسالعان ليسەنزيالار مەن باسقا دا قۇقىق بەلگىلەۋشى قۇجاتتار بولادى. ادامنىڭ اسەرىن كۇشەيتىپ، پايدالانۋشىنىڭ سەنىمىن ارتتىرۋ ءۇشىن مۇنداي رەسۋرستار ينۆەستيتسيادان تۇسەتىن بولجامدى پايدانىڭ كالكۋلياتورىن دا ورنالاستىرىپ قويادى»، - دەلىنگەن اقپاراتتا.
مىسالى، كەيبىر انىقتالعان الاياقتىق سحەمالاردا بيرجالىق ساۋدادا اقشا تابۋ ءۇشىن سايتتا تىركەلۋ كەزىندە اقشالاي سالىمدى تالاپ ەتەدى. وسىدان كەيىن الاياقتار ءوز قۇربانىنا ساۋدا شوتى اشىلعانى تۋرالى ۇلتتىق بانكتىڭ اتىنان سەرتيفيكات جىبەرەدى. ول سەرتيفيكاتتا ۇلتتىق بانكتىڭ لوگوتيپى، جالعان قويىلعان قولدار مەن ءموردىڭ سۋرەتى جانە ۇلتتىق بانكتىڭ جالعان قىزمەتكەرلەرى تۋرالى اقپارات بولادى.
«اتالعانداردى ەسكەرە وتىرىپ، ۇلتتىق بانك مۇنداي رەسۋرستاردا الاياقتىق ارەكەتتەردىڭ ايقىن بەلگىلەرى بار ەكەنىن مالىمدەيدى، سەبەبى:
· ۇلتتىق بانك جەكە تۇلعالاردىڭ شوتىنا قىزمەت كورسەتپەيدى، اقشالاي ەسەپ ايىرىسۋ مەن مامىلەلەر جۇرگىزبەيدى؛
· ۇلتتىق بانك مەملەكەتتىك قورلاردان تابىس تابۋ ءۇشىن قانداي دا ءبىر پلاتفورمالاردى ازىرلەۋگە قاتىسپايدى؛
· رەسۋرستاردا قىسقا ۋاقىت ىشىندە جوعارى پايداعا جالعان كەپىل بەرەتىن اقپارات قامتىلادى، سونداي- اق بايلانىس دەرەگى جوق؛
· الاياقتار بەيرەسمي نومىرلەردەن بەلسەندى تۇردە قوڭىراۋ شالىپ، جالعان قۇقىق بەلگىلەيتىن قۇجاتتاردى ۇسىنادى؛
· ءىس جۇزىندە اكتيۆتەردى ينۆەستيتسيالىق باسقارۋعا ليتسەنزياسى بار ۇيىمداردىڭ تىزبەسى قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگىنىڭ رەسمي سايتىندا جاريالانعان»، - دەلىنگەن ۇ ب مالىمەتىندە.
كەڭەس الۋ ءۇشىن 1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا حابارلاسۋعا بولادى.