اتاقتىلار جايلى اڭىزدار - قياسبايدىڭ ەركەلىگى

استانا. قازاقپارات - حاكىم اباي اتامىزدىڭ ەرەكشە قاسيەتتەرى كوپ بولىپتى. سولاردىڭ ءبىرى، الدىنا كەلىپ وتىرعان ادام نەگىزگى شارۋاسىنا بىردەن كوشپەسە، ارتىنان سۇراعانىن بەرمەيدى ەكەن.
None

وزىنە جۇگىنىپ كەپ وتىرعان كىسىدەن «نە شارۋا؟» دەپ سۇراپ الاتىن اقىن، بىردەن سۇراماعان كىسىگە «جوق» دەپ جاۋاپ بەرەتىن بولعان.

وزدەرىڭ بىلەتىندەي اباي اتامىز اۋقاتتى وتباسىنان شىققان. حالىق جاعىنداعى ادىلەتتى اقىن بولعان. اباي تەك ءبىر-اق ادامنىڭ ەركەلىگىن كوتەرەدى ەكەن. ول - قياسباي دەگەن توبىقتىداعى كۇلدىرگى، تاپقىر كىسى. سول قياسباي بىردە ابايدىڭ ۇيىنە كىرىپ كەلسە، وڭكەي ىعاي مەن سىعاي جينالىپ وتىر ەكەن. مۇنى ەشكىم ادام ەكەن دەپ ەلەمەگەن سوڭ، ابايعا قاراپ:

- مىنالارىڭا شىق دەشى، - دەپتى. اقىن ولاردى شىعارىپ جىبەرىپ:

- نە شارۋا ەدى؟ - دەيدى. سوندا قياسباي:

- مىنالارعا ءوزىمنىڭ كىم ەكەنىمدى كورسەتەيىن دەگەنىم عوي، - دەپ جاۋاپ بەرىپتى.

«موينىما اجىم تۇسەدى»

قازاق ادەبيەتىننىڭ كورنەكتى وكىلى ساكەن سەيفۋللين اتالارىڭ دا ەرەكشە ادام بولعان. ەل ىشىندە «ساكەننىڭ ءسانىن بەرسىن» دەگەن ءسوز ءجيى ايتىلادى. بۇل بەكەر ەمەس. ساكەن وتە سۇلۋ ادام بولعان. بۇرىلعاندا بۇكىل دەنەسىمەن بۇرىلادى ەكەن. مۇنىسىن سۇراعاندارعا، «موينىما ءاجىم تۇسەدى» دەپ جاۋاپ قايىرعان كورىنەدى. جۇمىسقا كەلگەندە ورىندىعىنا شالبارىنىڭ قىرى كەتپەس ءۇشىن وتىرمايدى ەكەن. مۇنداي سۇلۋلىققا شوقان اتالارىڭنىڭ دا يە بولعانىن ايتا كەتكەن ءجون. شوقان پەتەربوردىڭ كوشەسىمەن جۇرگەندە، ورىستىڭ بۇكىل قىزدارى: «قازاقتىڭ حانزاداسىن كورەمىز»، - دەپ بالكوندارىنا شىعىپ تۇرىپتى.

«ۇرىسقاق ايەل»

اڭگىمە جازۋدىڭ حاس شەبەرى بەيىمبەت مايلين بىلايعى دۇنيەمەن ءىسى جوق كىسى ەكەن. ءتىپتى، سوعىم ءۇشىن جىلقى الۋعا بازارعا ايەلى باراتىن بولعان. جازۋ ۇستەلىنە وتىرعاندا، اينالاسىندا ۋ-شۋ بولىپ جاتسا دا، ءمان بەرمەگەن. بىردە ۇيىنە ەندى كىرگەن ايەلىنە ءاي-شاي جوق ايعاي سالادى. ايەلى دە قاراپ تۇرماي، ۇرىسا كەتەدى. ۇرىس ەندى قىزا تۇسكەندە، بياعاڭ تىپ-تىنىش جازۋ ۇستەلىنە بارىپ جايعاسادى. مۇنىڭ ءمانىسىن كۇلجامال انامىز تۇسىنبەي قالادى. كەيىن سۇراسا، ءبىر شىعارماسىنا ۇرىسقاق ايەلدىڭ وبرازى كەرەك بولىپتى. بۇل جازۋشىنىڭ «راۋشان-كوممۋنيست» دەگەن پوۆەسىن جازىپ جاتقان كەزى ەكەن.

ازىرلەگەن باعاشار تۇرسىنباي ۇلى

(«ۇلان»،21.08.2012)

سوڭعى جاڭالىقتار