امەريكادا قازاقتار قازىنى قايدان الادى؟

استانا. قازاقپارات - ەلدەن جىراقتا جۇرگەندە تۋعان ەلدىڭ اس- ءدامىن ساعىنبايتىن ادام كەمدە- كەم.

ال ءتۇرلى سەبەپتەرمەن مۇحيت اسىپ، ا ق ش- تا جۇمىس بابىمەن تۇرىپ جاتقان قازاقتار قازىنى قايدان الادى؟ نيۋ- يوركتە «تاشكەنت» دەپ اتالاتىن سۋپەرماركەت بار. بۇل جەر ناعىز وزبەك بازارىن ەسكە تۇسىرەدى. پوستكەڭەستىك ەلدەردىڭ ازاماتتارى ۇيرەنىسىپ قالعان اسىن الۋ ءۇشىن برۋكليندەگى وسى دۇكەنگە بارادى ەكەن. قازى ساعىنعان قازاقتار قانشا الىس بولسا دا، ا ق ش- تىڭ وزگە شتاتتارىنان نيۋ- يورككە ارنايى كەلەدى. مۇندا شيكى دە، پىسكەن دە شۇجىق الۋعا بولادى.

ۆيردجينيا شتاتىنىڭ تۇرعىنى قارشىعا باياتوۆا 400 شاقىرىمنان كەلدى. قارشىعا باياتوۆا، ۆيردجينيا شتاتىنىڭ تۇرعىنى:

- قازاق قازىسىز قالاي قازاق بولادى؟ ەت اساسىڭ، قوناق شاقىراسىڭ، سول كەزدە قازى قويعان ءبىزدىڭ ءداستۇرىمىز عوي. ەندى، كورىپ تۇرعانىڭىزداي، ءبىر كەلگەندە بىرنەشە قازى الۋعا تىرىسامىز، ءبىراز ۋاقىتقا جەتۋى ءۇشىن.

«تاشكەنت» سۋپەرماركەتىنىڭ برۋكليندە اشىلعانىنا 6 جىلداي بولدى. مۇندا ءتىپتى قالا مەرىنىڭ ءوزى باس سۇعىپ ءدام تاتقان. ارينە، نەگىزگى تۇتىنۋشىلارى - ورتالىق ازيا مەملەكەتتەرىنىڭ وكىلدەرى. پوستكەڭەستىك ەلدەردەن كەلگەن كليەنتتەر عانا ەمەس، جەرگىلىكتى تۇرعىندار دا ساۋدا جاسايدى.

فيرداۋس راحمونوۆ، دۇكەن قىزمەتكەرى:

- ءبىزدىڭ دۇكەن جۇمىس ىستەگەلى ءبىراز جىل بولدى. نەگىزىنەن پوستكەڭەستىك ەلدەردەن كەلگەن ادامدار - ءبىزدىڭ كليەنتتەرىمىز. وزدەرىنىڭ ۇلتتىق تاعامدارىن ساعىنعاندار وسىندا كەلەدى.

فاست- فۋدتەن جالىققان جۇرت مانتى، لاعمان، ءبالىشتىڭ ءتۇر- ءتۇرىن تابا الادى. 200 دەن استام اس سۋ ۇسىنىلعان. سونىمەن قاتار مۇندا ساتىلاتىن تاۋارلار دا ورتالىق ازيا مەملەكەتتەرىنەن تاسىمالدانادى. سوعان ساي باعاسى دا ارزان ەمەس.

سۆەتلانا، نيۋ- يورك قالاسىنىڭ تۇرعىنى:

- امەريكاعا كەلگەنىمە 5 جىل بولدى. ۋاقىت بولعاندا كەلىپ تۇرامىز. باعا وتە قىمبات بولسا دا الامىز. ساپاسى جاقسى. ەڭبەكقورلىق، تازالىق ءارى جاقسى قىزمەت كورسەتۋ - «تاشكەنتتىڭ» باستى ۇستانىمى. سودان بولسا كەرەك، كاسىبىن دوڭگەلىپ وتىرعان الا شاپاندى اعايىندار كۇن سايىن برۋكليندە تولاعاي تابىسقا كەنەلىپ جاتىر.

اۆتورى: نۇربەك بەكەن.

www.24.kz