گولليۆۋدشا توناۋ: استانا تۇرعىنى بانككە كىرۋ ءۇشىن ءبىر جىل بويى تۋننەلدى قالاي قازدى؟

استانا. قازاقپارات - جاقىندا ستەپنوگورسك قالاسىندا تۋننەل ارقىلى زەرگەرلىك بۇيىمدار دۇكەنىن توناۋ وقيعاسى ورىن الدى.

ءدال وسى كەزدە كوپتەگەن استانالىق 2000 -جىلداردىڭ سوڭىندا قالادا ءدال وسىنداي قىلمىستىڭ قالاي بولعانىن ايتا باستادى.

2009 -جىلى استانا تۇرعىنى سەسنابانكتەگى گاراجدان اقشا ساقتالاتىن قويماعا دەيىن 74 مەترلىك تۋننەل قازۋعا ءبىر جىلدان استام ۋاقىت جۇمساعان. ءبىراق ونىڭ بارلىق تالپىنىسى ناتيجەسىز اياقتالعان.. . Tengrinews.kz سەنساتسيالىق قىلمىستىق ءىس تۋرالى ەگجەي- تەگجەيلى جازدى.

وقيعا قالاي باستالعان ەدى؟

2005 -جىل. استانالىق 28 جاستاعى ولەگ م. (ەسىمى وزگەرتىلگەن) برازيلياداعى تۋننەلدىڭ كومەگىمەن بانك توناۋى تۋرالى وقيعانى كورىپ وتىرىپ: «وسىلاي دا بانك توناۋعا بولادى ەكەن عوي» دەپ ويلاعان. ول كەزدە ونىڭ ۇيلەنگەنىنە 10 جىلداي ۋاقىت بولىپ، ەرلى- زايىپتىلار بالالى بولا الماي جۇرگەن ەكەن. ەمدەلۋ كومەكتەسەتىن بولعانىمەن، وعان اقشا قاجەت ەدى. ول شەتەلدىك كولىكتەردى تاسىمالداۋدان جانە بازاردا ەسىك ساتۋدان اقشا تاپقانىمەن، بۇل جەتپەگەن. وسىدان كەيىن ولەگ اقشا توناۋ ءىسىن اسىقپاي، دۇرىستاپ ويلانا باستاعان.

بانك توناۋ جوسپارى

استانا تۇرعىنى جۇمىسىن بىرنەشە جىلدان كەيىن، 2008 -جىلدىڭ ماۋسىم ايىندا باستاعان.

«2008 -جىلدىڭ ماۋسىم ايىنىڭ باسىندا ول بەيبىتشىلىك كوشەسىندەگى سەسنابانكتىڭ استانالىق فيليالىنىڭ دەپوزيتاريىندە ءوز اتىنا سەيف اشىپ، بانك قىزمەتكەرىمەن بىرگە دەپوزيتاريگە ءتۇسىپ، سول جەردەن بانكتىڭ ورنالاسقان جەرىن كورگەن. جالپى قويمادا ول ەكى رەت بولعان. دەپوزيتاريگە اقشا سالعان»، - دەلىنگەن قىلمىستىق ءىس ماتەريالىندا.

سول جىلدىڭ شىلدەسىندە ولەگ جۇمىسسىز قالعان. سودان كەيىن بۇل جوسپارىنا بەل شەشە كىرىسكەن. ول ادام بانك عيماراتىن ۆيزۋالدى تەكسەرۋ جۇرگىزگەن. قولما- قول اقشانى تاسىمالدايتىن كولىكتەر قايدا باراتىنىن باقىلاعان. وسىعان سۇيەنە وتىرىپ، سونداي- اق دەپوزيتاريدىڭ ورنالاسقان جەرىن بىلە وتىرىپ، استانا تۇرعىنى اقشانى ساقتاۋعا ارنالعان بانكتەگى ورىندى ەسەپتەپ شىعارعان.

بانككە اپارار تۋننەل

ولەگ تەك قازۋدى نەدەن باستاۋ كەرەگىن ويلانا باستاعان. بۇل ءۇشىن بانكتىڭ جانىندا ورنالاسقان گاراجدار وتە قولايلى ەدى. ولەگ ولاردىڭ ءبىرىن جالعا الىپ، ونىڭ استىنان بانككە اپاراتىن تۋننەل قازامىن دەگەن شەشىمگە كەلگەن. ويعا العان ءىسىن باستاماس بۇرىن، بارلىعىن بۇگە- شىگەسىنە دەيىن جوسپارلاعان. ءوز اتىنا تىركەلمەگەن جاڭا SIM كارتا ساتىپ الىپ، وسى نومىرمەن جاقىن ماڭداعى اۋلالارعا: «قىمباتقا گاراج جالعا الامىن» دەگەن حابارلاندىرۋ قالدىرعان.

قىلمىستىق ءىس ماتەريالدارىنان الىنعان سۋرەت. بانك عيماراتىنىڭ ارتقى جاعى. سول جاقتا تۋننەل قازىلعان گاراج

تامىز ايىندا گاراج يەلەرىنىڭ ءبىرى حابارلاندىرۋعا جاۋاپ بەرگەن. ولەگ ءوزىن باسقا ەسىممەن تانىستىرىپ، جالداۋ اقىسىن ءتورت ايعا الدىن الا، 20000 تەڭگەدەن تولەگەن. سول ايدىڭ ورتاسىندا جوسپاردىڭ نەگىزگى جانە ەڭ ماڭىزدى بولىگى گاراجدان بانككە قاراي تۋننەل قازۋدى باستاعان. ولەگ ەڭ الدىمەن تەرەڭدىگى ءتورت مەتردەي ور قازعان. سول ارقىلى بۇل جەردە جەر استى سۋىنىڭ بار- جوعىن تەكسەرگەن.

«ول سۋدىڭ جوقتىعىنا كوز جەتكىزگەننەن كەيىن، توپىراق تاسۋ ءۇشىن كولىك قاجەت ەكەنىن تۇسىنگەن. ولەگ ەڭ قاراپايىم قۇرالدار: بالتا، كۇرەك قايلانى پايدالانعان. ونىڭ ىشىندەگى ەڭ قىمبات قۇرال - شامامەن 92 تەڭگە تۇراتىن لازەرلىك ولشەگىش. 2008 -جىلدىڭ قازان ايىنىڭ باسىندا ول گاراجدا ەلەكتر جارىعىن قالپىنا كەلتىرگەن. الماتىدان ءۇش مىڭ دوللارعا اق ءتۇستى Nissan Sunny كولىگىن ساتىپ الىپ، كەيىن ونى توپىراق تاسىمالداۋعا پايدالانعان»، - دەلىنگەن ۆەدومستۆونىڭ قىلمىستىق ءىس ماتەريالدارىندا.

گاراج ءىشى. وڭ جاقتاعى ەدەندەگى تەسىك تۋننەلدىڭ كىرەبەرىسى ©

تۋننەل قازۋدى باستاۋ

ولەگتىڭ ايعاقتارىنا سايكەس، ول 2008 -جىلدىڭ جەلتوقسانىندا بانككە قاراي كۇنىنە 60 سانتيمەتر جەر قازۋدى باستاعان. قابىرعالار مەن توبەلەر تاقتالارمەن بەكىتىلگەن. ول اعاش ەدەن جاساپ، ءتىپتى جارىق جۇرگىزگەن. توپىراق تولتىرىلعان قاپتى تۋننەل ارقىلى تاسىمالداۋدى جەڭىلدەتۋ ءۇشىن دوڭگەلەگى بار ۆاگونەتكانى پايدالانعان. سودان كەيىن ول قاپتى الىپ شىعىپ، سارىارقا اۋدانىنداعى قوقىس كونتەينەرلەرىنە لاقتىرىپ جىبەرگەن. ول مۇقيات جانە باياۋ ارەكەت ەتكەن. ايتپاقشى، ولەگ دەمالىس كۇندەرى دەمالۋدى ۇمىتپاعان.

تۋننەل ارقىلى بانككە كىرۋ

قىلمىستىق ءىس ماتەريالدارىندا 2009 -جىلدىڭ مامىر- ماۋسىم ايلارىندا ولەگتىڭ سەسنابانك عيماراتىنىڭ استىندا بولعانى ايتىلادى. وسى كەزدە ول قازۋدى بىرنەشە ايعا توقتاتىپ، بانك استىنان قاي بولمەگە كەلگەنىن اياق دىبىستارى ارقىلى تىڭداي باستاعان.

دىبىستاردان ولەگ عيماراتتىڭ قاي بولىگىنىڭ استىندا ەكەنىن جانە اقشا ساقتالعان قويماعا دەيىن قانشالىقتى الىس ەكەنىن تۇسىنۋگە تىرىسقان. وسىلايشا ول دەپوزيتاريدىڭ استىنان شىققانىن شامامەن انىقتاعان.

توپىراق قاپتارى. ولەگ ولاردى سارىارقا اۋدانىنداعى قوقىس جاشىكتەرىنە لاقتىرىپ جىبەرگەن © tengrinews.kz

«2009 -جىلدىڭ تامىز ايىندا كولىك بازارىندا ول Nissan Sunny كولىگىن قاجەتسىز دەپ 2000 دوللارعا ساتتى. ال سەنبىدەن جەكسەنبىگە دەيىن، ياعني 2009 -جىلدىڭ 17-قازانىنان 18-قازانىنا دەيىن دومكراتپەن ەدەندى ويعان. بانك ەدەنىن تەسكەندە قاتەلەسىپ قارۋ- جاراق قويماسىنا كىرىپ كەتكەنىن كورگەن. اقشا ساقتالعان قويماعا تۋرا تۇسە الماعانىنا كوزى جەتكەن ونىڭ ەڭسەسى ءتۇسىپ، ۇرلىقتان باس تارتقان»، - دەلىنگەن ءىس ماتەريالدارىندا.

برازيلياداعى توناۋشىلار ءالى ۇستالماعان

ولەگتىڭ شابىتتاندىرعان برازيليالىق جاڭالىقتاردا ايتىلعان توناۋدىڭ ءساتتى اياقتالعانى بولاتىن. وندا ۇرىلار تۋننەلدىڭ كومەگىمەن بانكتى توناپ، وزدەرىمەن بىرگە ءۇش جارىم توننا اقشانى، ياعني 68 ميلليون دوللاردى الىپ كەتكەن. ايتپاقشى، قىلمىسكەرلەر ءالى ۇستالعان جوق.

«ول قايتقان سوڭ گاراج ەسىگىن قۇلىپتاپ، وزىمەن بىرگە بارلىق ۇساق قۇرالداردى الىپ، كيىمدەرىمەن بىرگە لاقتىرىپ جىبەرگەن. تەك لازەرلىك ولشەگىشتى عانا قالدىرعان. سەبەبى بۇل قۇرال قىمبات ەدى»، - دەلىنگەن قىلمىستىق ىستە.

© tengrinews.kz

استانالىق جالعىز ءوزى قازعان 74 مەترلىك تۋننەل. ەدەندە ارباعا ارنالعان رەلستەر كورىنەدى. قابىرعالارى تاقتالارمەن نىعايتىلعان

بانكتىڭ ەدەنىندەگى تەسىكتىڭ ناقتى قالاي انىقتالعانى سوت ۇسىنعان ءىس ماتەريالدارىندا كورسەتىلمەگەن. الايدا سول كەزدەگى ب ا ق تۋننەلدى قىزمەتكەرلەردىڭ ءبىرى 19-قازاندا لينولەۋممەن جابىلعان شۇڭقىرعا قۇلاپ كەتە جازداعاندا بايقاعانىن جازعان. ول تۋننەلگە العاش ءتۇسىپ، ولەگ اتقارعان جۇمىستىڭ اۋقىمىن باعالاعاندا قانداي سەزىمدەردى باستان وتكەرگەنىن ەلەستەتىپ كورىڭىز. سودان كەيىن وقيعا ورنىنا پوليتسيا شاقىرىلعان. تەز ارادا بانك قويماسى مەن دەپوزيتاريى تەكسەرىلگەن. ايتپاقشى، بۇل كەزدە سەسنابانكتە 422 ميلليون 512 مىڭ تەڭگە قولما- قول اقشا بولعان.

پوليتسياعا تۋننەل قازۋشىنى تابۋ ءۇشىن ءبىر ايدان ءسال استام ۋاقىت جۇمساعان. ۇستاۋ وپەراتسياسى 2009 -جىلى 24-قاراشادا ونىڭ ۇيىندە بولعان. نەگىزىندە توناۋ ارەكەتىمەن ءبىر توپ ادام جۇمىس ىستەگەن بولۋى مۇمكىن، ونىڭ ىشىندە بانك قىزمەتكەرلەرى، سونداي- اق ولەگتىڭ اعاسى بولعان دەگەن بولجام بار. ءبىراق بۇعان دالەل تابىلماعاندىقتان، ولەگ سوتتالعان.

ولەگ م. -نىڭ مۇلكى تاركىلەنىپ، ءتورت جىلعا باس بوستاندىعىنان ايىرۋ جازاسى تاعايىندالعان. ول جازاسىن جالپى تارتىپتەگى كولونيادا وتەگەن. سونداي- اق بانككە كەلتىرىلگەن بىرنەشە ميلليون تەڭگە شىعىندى وتەۋگە ءماجبۇر ەتىلگەن. تۋننەل توپىراقپەن تولتىرىلعان. قازىردە ولەگ جازاسىن وتەپ، تۇرمەدەن شىققان بولۋى كەرەك. ارى قاراي تاعدىرى نە بولعانى بەلگىسىز.

massaget.kz