ەلوردادا ەرەكشە بالانى ۇرىپ-سوعۋ فاكتىسى تاعى قايتالاندى

استانا. قازاقپارات - بيىل قاڭتاردا استانالىق انا بالاسىن تاربيەلەنىپ جاتقان ورتالىقتىڭ قىزمەتكەرى ۇرىپ-سوقتى دەپ شاعىم تۇسىرگەن ەدى. اراعا ۋاقىت سالىپ ۇرىپ-سوعۋ وقيعاسى قايتالانىپ وتىر، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«3- مامىردا ساعات 19:48 دە پوليتسياعا 6 جاسار ۇلىنا قالانىڭ وڭالتۋ ورتالىقتارىنىڭ بىرىندە جاسالعان قاتىگەزدىك فاكتىسى بويىنشا ەلوردا تۇرعىنى ارىزبەن جۇگىندى. «الماتى» اۋداندىق پوليتسيا باسقارماسى قىلمىستىق كودەكستىڭ 140-بابى بويىنشا «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» ايىبىمەن سوتقا دەيىنگى تەرگەپ-تەكسەرۋ باستالدى»، - دەلىنگەن حابارلامادا.

اقپاراتتا ايتىلعانداي، اتالعان فاكتى بويىنشا قاجەتتى ساراپتاما تاعايىندالدى.

«قىلمىستىق-پروتسەستىك كودەكسىنىڭ 201-بابى نەگىزىندە تەرگەۋ مۇددەسىندە سوتقا دەيىنگى تەرگەپ-تەكسەرۋدىڭ وزگە دە دەرەكتەرى جاريا ەتىلۋگە جاتپايدى»، - دەيدى ۆەدومستۆودان.

ەسكە سالا كەتسەك، بيىل قاڭتاردا ەلوردادا ەرەكشە بالالاردى ۇرىپ-سوققان استانالىق تاربيەشىنىڭ ۇستىنەن قىلمىستىق ءىس قوزعالعان ەدى.

ىشكى ىستەر مينيسترلىگىنىڭ اقپاراتىنشا، 17- قاڭتاردا پوليتسياعا ەلوردا تۇرعىنى «بالام-اي» بالانى دامىتۋ ورتالىعىندا ونىڭ كامەلەتكە تولماعان ۇلىنا قاتىگەزدىكپەن قاراۋ فاكتىسى بويىنشا جۇگىندى.

كەيىن ەلىمىزدىڭ باس پروكۋرورى بەرىك اسىلوۆ اتالعان وقيعانىڭ ءمان-جايىن انىقتاۋدى ءوز باقىلاۋىنا الاتىنىن ءمالىم ەتتى.